11/09/2013 15:21:04

Modeli i ri ekonomik

Program i ri ekonomik lidhet me një koncept e politikë të qartë për modelin e rritjes ekonomike

TIRANE - Qeveria e re Socialiste, e drejtuar nga kryeministri Edi Rama ka programuar një model të ri ekonomik, në bazë të të të cilit, të garantohet rritja e qëndrueshme.

Në Programin e Zhvillimit Ekonomik, qeveria e re përmes politikave të reja ekonomike dhe zhvillimit, ka përcaktuar politika strukturore që konvergojnë më mirë e më shpejt me ekonominë evropiane si dhe sektorët, që do përbëjnë «motorin» e ekonomisë shqiptare në vitet në vazhdim.

Qeveria angazhohet të vendosë një dialog të përhershëm me komunitetin e sipërmarrjes vendas dhe të huaj si dhe me ekspertizë të spikatur të huaj dhe vendase. Ky dialog do të institucionalizohet në ngritjen dhe funksionimin e Këshillit Ekonomik Kombëtar, i cili do të operojë pranë kryeministrit.

Qeveria e re angazhohet të gjejë e identifikojë burime të reja që ushqejnë rritjen ekonomike, apo “zëvendësuesit” e disa prej burimeve aktuale të rritjes përmes objektivave themelore të zhvillimit dhe modelit të rritjes ekonomike për 15-20 vitet në vazhdim.

Qeveria synon “profilin” e ekonomisë shqiptare të dy dekadave në vazhdim, të identifikuar me disa sektorë prioritarë si manifaktura, energjia, turizmi, bujqësia dhe agroindustria, arsimi dhe shërbimet.

Ky program i ri ekonomik lidhet me një koncept e politikë të qartë për modelin e rritjes ekonomike dhe faktorët jetësorë të saj. Mbyllja e periudhës 22-vjeçare të tranzicionit dhe kriza ekonomiko-financiare po shkon drejt fundit.

Qeveria synon politika më të strukturuara, të mirëadresuara e të gjera për nxitjen maksimale të rritjes ekonomike, garantimin faktorial të qëndrueshmërisë së saj, rritjen e prodhimit vendas dhe eksporteve, për hapjen masive të vendeve të reja të punës.

Qeveria planifikon në programin e saj ekonomik që të identifikojë qartë faktorët e rinj të rritjes ekonomike, me synim që me anë të mbështetjes së sektorëve prioritare dhe politikave e masave specifike t’i kthejë në avantazhe konkurruese.

Njëzet e dy vjet mbas fillimit të zbatimit të “terapisë së shok-ut” dhe ndërtimit të “ekonomisë së tregut”, po shkon drejt mbylljes përfundimtare një cikël i rëndësishëm i tranzicionit “nga planifikimi i centralizuar, drejt tregut të lirë”, pasi janë shfrytëzuar e përdorur shumë mundësi për vendosjen dhe performancën e ekonomisë së tregut në kuadrin e paketës së rregullimeve strukturore, ruajtjen e ekuilibrave makroekonomikë. Na ndiqni dhe në Facebook dhe Twitter

Komunikatë për Shtyp

Dërgo me email | Stampo artikullin