10/09/2013 19:44:15

Kritikat e para, pas dekretimit te Kryeministrit Rama

''Maxhoranca po i mohon opozitës kohën më minimale që ka qënë praktikë në çdo legjislaturë për t'u njohur me programin e qeverisë, i cili deri në këto momente mbetet një mister i madh''

TIRANË - Kryetari i Partisë Demokratike, Lulzim Basha, tha sot se opozita po përballet me një mendësi dhe kulturë të vjetër komunikimi nga ana e maxhorancës.

Në një prononcim për shtyp, pas mbledhjes së Grupit Parlamentar të PD-së, Basha theksoi se "kjo është maxhoranca, e cila në opozitë ka kërkuar dhe ka marrë deri në 10 ditë për çështje të tilla si aparatet matëse dhe që sot u mohon qytetarëve shqiptarë të drejtën legjitime kushtetuese për të dëgjuar një debat".

"Maxhoranca po i mohon opozitës kohën më minimale që ka qënë praktikë në çdo legjislaturë për t'u njohur me programin e qeverisë, i cili deri në këto momente mbetet një mister i madh", nënvizoi Basha.

Kreu i PD-së i bëri thirrje kryetarit të ri të Kuvendit që "t'i qëndrojë besnik fjalëve që sapo tha dhe të rivendosë një standard të ri të përmirësuar sikundër premtoi, të paktën standardin e zbatuar deri tani, duke i dhënë kohën e nevojshme parlamentit dhe opozitës për t'u njohur me programin e për të përgatitur një debat dinjitoz dhe transparent mbi programin e paraqitur".

"Në të kundërt kjo situatë është e papranueshme dhe ne do të marrim të gjitha masat që na takojnë si përfaqësuese e denjë e opozitës shqiptare në Kuvendin e Shqipërisë dhe si mbrojtëse e virtyteve thelbësore të opozitës, që janë transparenca dhe llogaridhënia", përfundoi Basha. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin