10/09/2013 19:03:09

Arsenali sirian i armëve kimike nën kontrollin e ndërkombëtarëve

Kreu i diplomacisë ruse, Sergei Lavrov bën publike planet e Moskës për Sirinë

(19:45) SHBA nuk do ta presë gjatë formulimin e propozimit rus mbi vënien e arsenalit kimik të Sirisë nën një kontroll ndërkombëtar, theksoi sot shefi i diplomacisë amerikane, John Kerry. "Në mënyrë që ky variant diplomatik të rezultojë i suksesshëm, kërcënimi i ndërhyrjes së mundshme ushtarake amerikane duhet të mbetet real dhe i besueshëm", shtoi nga ana e tij sekretari amerikan i Mbrojtjes, Chuck Hagel gjatë një seance punimesh me Komisionin e Mbrojtjes në Dhomën e Përfaqësuesve.


(19:41) Ekzistojnë ende shumë pyetje që nuk kanë marrë lidhur me propozimin e bërë nga Rusia mbi dorëzimin e armëve kimike nga Damasku tek autoritetet e komunitetit ndërkombëtar, sipas një deklarate të bërë nga kreu i qeverisë britanike, David Cameron. ''Për sa i takon propozimit të bërë nga Rusia për dorëzimin tek komuniteti ndërkombëtar të armëve kimike të Damaskut, ka ende shumë pyetje të cilave u duhet gjetur një përgjigje dhe shumë çështje të tjera që po ashtu u duhet gjetur një zgjidhje'', theksoi kryeministri britanik, David Cameron.


(19:40) Siria ka pranuar sot propozimin e bërë nga Rusia për të vënë nën kontrollin e komunitetit ndërkombëtar arsenalin kimik të Damaskut. ''Siria pranon propozimin për vendosjen e armëve të saj kimike nën kontrollin e komunitetit ndërkombëtar'', deklaroi pak më parë në Moskë, ministri i Jashtëm sirian, Walid al Muallim gjatë një takimi të zhvilluar me Sergei Narishkin, presidenti i Dumës, dhoma bazë e parlamentit të Rusisë, njoftonte në faqen e saj të internetit agjencia ruse e lajmeve Interfax.


(19:37) Sekretari i përgjithshëm i Lidhjes Arabe, Nabil al-Arabi deklaroi sot se mbështet propozimin rus për vendosjen nën kontrollin e ndërkombëtarëve të arsenalit kimik sirian, ku kërkoi mbështetje për një ''zgjidhje politike'' për konfliktin që ka shkaktuar tashmë mbi 100 mijë të vdekur përgjatë dy viteve e gjysmë në Siri. Dje, Moska tronditi pak arenën ndërkombëtare të politikës duke bërë të ditur se i kishte bërë ftesë Damaskut të vendoste stokun e armëve të tij kimike nën kontrollin e komunitetit ndërkombëtar, për të shmangur sulmet eventuale amerikane kundër regjimit të Damaskut, që perëndimi akuzon se është përgjegjës për sulmet kimike të 21 gushtit, në periferi të kryeqytetit sirian.


MOSKË - Rusia po punon me regjimin e Damaskut për përpilimin e një "plani konkret", që ka synim vendosjen e arsenalit kimik të Sirisë nën kontrollin e ndërkombëtarëve, deklaroi kreu i diplomacisë ruse, Sergei Lavrov. "Pala ruse po punon aktualisht për përpilimin e një plani të zbatueshëm, të saktë dhe konkret për të cilin po mbahen kontakte të vazhdueshme me palën siriane", theksoi Lavrov, gjatë një konference për shtyp të mbajtur së bashku me homologun e tij libian, Mohamed Abdelaziz. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin