05/09/2013 18:28:24

Epërsi e kancelares ndaj socialdemokratit Peer Steinbrück

Rreth 59 për qind e gjermanëve u përgjigjen se do të votonin Angela Merkel dhe vetëm 30 për qind Peer Steinbrück

BERLIN - Kancelarja, Angela Merkel vazhdon të jetë në avantazh në krahasim me rivalin e saj socialdemokrat, Peer Steinbrück edhe pas debatit televiziv mes tyre, sipas një sondazhi të publikuar sot, rreth dy javë para zgjedhjeve legjislative.

Pyetjes "Kush do të dëshironit të ishte kancelari juaj?", 59 për qind e gjermanëve iu përgjigjën Angela Merkel dhe vetëm 30 për qind Peer Steinbrück sipas një ankete të transmetuar nga televizioni publik gjerman ZDF. Për sa i përket pyetjes se kë do të votonin, 41 për qind thanë se do të votonin CDU-në dhe 26 për qind për SPD-në.

Sipas sondazhit, kancelares Merkel do t'i jepet mundësia të rinovojë koalicionin e saj qeveritar me liberalët e partisë FDP, për të cilët parashikohen 6 për qind të votave pas zgjedhjeve të 22 shtatorit.

Për të Gjelbrit parashikohen 10 për qind të votave dhe për partinë e majtë radikale "Die Linke" tetë për qind. Votat për partinë anti-euro AfD mbeten në nivelin e pandryshuar 3 për qind sipas sondazhit, duke mos mundur të kalojnë kufirin 5 për qind të nevojshëm për të patur deputetë.

Sondazhi i zhvilluar nga instituti "Wahlen" me pjesëmarrjen e 1 296 personave përfaqësues të elektoratit gjerman u zhvillua më 2-4 shtator. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin