03/09/2013 16:10:17

Pakujdesia e aktit të Berishës. Përplasje kompetencash me METE

Pak ditë më parë, Zyra për Mbrojtjen e Konsumatorit i drejtoi ankesë zyrtare Autoritetit të Konkurencës për hetimin e pozitave oligopol në kompanitë e importit të karburanteve dhe abuzim me pozitat dominante në treg me qëllim stabilizimin e çmimeve të larta në dëm të konsumatorëve shqiptarë

TIRANË - Pas kërkesës së Kryeministrit Sali Berisha për publikimin me dekret të posaçëm të emrave të atyre kompanive hidrokarbure që kanë shitur naftë jashtë standarteve për konsumatorët, ka reaguar Mnistria e Ekonomisë.

Zv/ministri i Ekonomisë, Tregtisë dhe Energjetikës, Eno Bozdo, tha se nuk është e nevojshme një akt i tillë pasi Drejtoria e Përgjithshme e Metrologjisë ka të drejtat e plota ligjore për publikimin e inspektimit.

"Projekt-akti normativ është përgatitur nga DPM, por pas konsultimeve të gjëra juridike, METE mendon se nuk është i nevojshëm një akt i tillë për sa kohë ekziston e gjithë hapësira ligjore që Drejtoria e Përgjithshme e Metrologjisë të bëjë publike rezultatet e inspektimit të saj", deklaron Bozdo.

Për më tepër, u shpreh ai, ligji për Metrologjinë shpreh qartë detyrimin e DPM-së të publikojë të dhëna inspektuese, atëherë kur preken interesat e konsumatorit.

Bozdo tha se ky qëndrim zyrtar i Ministrisë së Ekonomisë, Tregtisë dhe Energjetikës i është përcjellë sot Drejtorisë së Përgjithshme të Metrologjisë, si dhe në të njëjtën kohë është vënë në dijeni edhe Kryeministri.

Pak ditë më parë, Zyra për Mbrojtjen e Konsumatorit i drejtoi ankesë zyrtare Autoritetit të Konkurencës për hetimin e pozitave oligopol në kompanitë e importit të karburanteve dhe abuzim me pozitat dominante në treg me qëllim stabilizimin e çmimeve të larta në dëm të konsumatorëve shqiptarë. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin