31/08/2013 21:12:44

Kur profesioni bëhet për favor...dikush tjetër mund t'a bëjë më mirë

nga Doriana Metollari

HermesNews - Një njeri merr një post. Kalon pak kohë dhe ndizet proçesi i të ndjerit komod...kalon dhe pak kohë dhe njeriu fillon e mendon se të tjerëve po u bën favor me punën e tij. Kjo për dy arsye: a) njerëzit mund të sillen sikur ai të ishte gjysëm/perëndi dhe i luten në vend që të mbajnë shtyllë kurrizore për të drejta dhe b) kalon kohë, pushteti centralizohet dhe zbehet etika në punë.

Këto ditë kërkova të kontaktoja zëdhënësin e komunitetit katolik në Shkodër për arsye profesionale. Nuk mora përgjigje, as me telefon, as me sms. Asnjë përgjigje pas kërkesës sime për të kërkuar informacione që lidhen me aktivitetet e Kishës Katolike në Shkodër.

Nuk është hera e parë që përplasem me indiferencë ndaj medias, por për mënyrën sesi e pashë unë, ishte indiferencë ndaj punës së tij jo ndaj meje.

Miku im më tha sot se kishte ndalur zëdhënësin e Kishës Katolike Shkodër, për t'i kërkuar një favor.

Favori isha unë.

Pas shkëmbimit të parë të përshëndetjeve shoqërore që miku im kishte bërë me të, i kishte kërkuar miqësisht të më linte takim, për "hallin tim".

Tani le të ndalemi pak. A mos po i ngatërrojme pak gjërat ne si qytetarë ? A mos po i shkëmbejmë favoret me të drejtat dhe detyrime që rrjedhin nga një marëdhënie profesionale ? Mendoj se ka shumë njerëz, që punën e bëjnë si favor. Mendoj se ka shumë njerëz që zhvillojnë punën si favor.

Ndoshta ky nuk është rasti i zëdhënësit të Kishës Katolike sepse marëdhënia ime me zoterinë është tepër e zbehtë për t'i veshur karaktere që mbase nuk i ka, por unë nisem nga kjo situatë e imja, për të kuptuar një problem të madh të shoqërisë shqiptare.

Le ta themi kur profesioni kthehet në favor, përjetohet një ndjenjë shumë e rehatshme. Kalon pak kohë dhe personi ka tërë kohën për ta bërë të tijën këtë ndjenjë. Në këtë pikë zor se e ka të lehtë të kuptojë se ku fillon puna e ku mbaron favori. Kështu zbehet etika e punës dhe forcohet ndjenja e pushtetit. Më vjen keq për qytetarët. Na ndiqni dhe në Facebook

HermesNews - ©2013

Dërgo me email | Stampo artikullin