27/08/2013 20:02:28

Bomba me fosfor ndaj civileve

Opozita: ''sulmi me bomba të ndaluara ndodhi në Aroum al Kubra, në zonën e Alepos, duke vrarë të paktën 10 civilë dhe duke plagosur dhjetëra të tjerë, ndërkohë që në Ariha, pranë Idlibit, aeroplanët e Assadit hodhën raketa duke vrarë dhe plagosur qindra civilë''

NEW YORK - Një seri sulmesh të kufizuara ndaj Sirisë në kuadër të një kundërpërgjigjieje për përdorimin e armëve kimike mund të fillojnë "duke nisur që nga e enjtja" dhe besohet të kenë një fashë kohore të paktën treditore, deklaroi për rrjetin informativ amerikan ''NBC'' një burim i administratës Obama. "Sulme tre ditore, të kufizuara dhe të mirëshënjestruara kundër objektivave dhe që kanë synim të përcjellin një mesazh të qartë për regjimin e Damaskut'', deklaroi burimi. Indikacionet mbi kalendarin kohor të veprimeve ushtarake kanë mbërritur pak më parë pas një serie të re telefonatash diplomatike të presidentit amerikan, Barack Obama me kryeministrin australian, Kevin Rudd dhe presidentin francez, Francois Hollande.

WASHINGTON - Presidenti Obama nuk ka vendosur ende për një ndërhyrje ushtarake ndaj regjimit të Damaskut, ka deklaruar një zyrtar i lartë i administratës amerikane. Dje, sekretari amerikan i Shtetit, John Kerry u shpreh se përdorimi i armëve kimike në Siri është i pamohueshëm dhe theksoi se një shkelje e tillë e së drejtës ndërkombëtare nuk duhet të mbetet pa pasoja.

LONDËR - Britania e Madhe, ushtria e së cilës po përgatitet për një ndërhyrje të mundshme në Siri, nuk po tenton të përmbysë regjimin e Bashar al-Assadit, theksoi sot zëvendëskryeministri britanik, Nick Clegg. "Nëse ne qëndrojmë duarkryq, diktatorë dhe krerë shtetesh brutalë do të mendojnë se mund të lirohen lehtësisht nga përgjegjësia e të përdorurit armë kimike dhe do ta bëjë këtë në një shkallë më të madhe në të ardhmen. Ajo që dëshirojmë ne është një përgjigje e rëndësishme ndaj kësaj. Ne nuk dëshirojmë një ndërrim të regjimit, nuk dëshirojmë madje as të përmbysim regjimin e Assadit", deklaroi Clegg për rrjetet BBC dhe Sky News.

KAJRO - Lirimi i Hosni Mubarakut nga burgu gjatë ditëve të fundit është i papranueshëm dhe ne do të protestojmë ndaj kësaj në ditët e ardhshme, u sot shpreh themeluesi dhe lideri i lëvizjes së "6 prillit", Ahmed Maher. Aktivistët e lëvizjes së "6 prillit" luajtën një rol kyç në protestat ndaj Mubarakut dhe Morsit. "Ushtarakëve nuk mund t'u besohet. Ata nuk i mbajnë premtimet'', tha ai.

WASHINGTON - Shtëpia e Bardhë konfirmoi sot se nuk vihej në dyshim që përgjegësia e sulmeve kimike të 21 gushtit në periferi të Damaskut i përkiste regjimit të presidentit sirian, Bashar al-Assad. "Regjimi sirian është përgjegjësi i përdorimit të armëve kimike më 21 gusht në afërsi të Damaskut, nuk ka asnjë dyshim mbi këtë për këdo që i thërret logjikës", deklaroi zëdhënësi i presidentit amerikan, Barack Obama, Jay Carney.

SIRI - Aeroplanë të forcave të Bashar al Assadit filluan të sulmojnë zonat e populluara pranë Alepos, me bomba me fosfor e napalm dhe sulme ajrore me raketa ndaj popullsisë civile pranë Idlibit, duke shkaktuar qindra të vdekur e të plagosur, njoftoi një komunikatë e opozitës siriane. "Sulmi me bomba të ndaluara ndodhi në Aroum al Kubra, në zonën e Alepos, duke vrarë të paktën 10 civilë dhe duke plagosur dhjetëra të tjerë, ndërkohë që në Ariha, pranë Idlibit, aeroplanët e Assadit hodhën raketa duke vrarë dhe plagosur qindra civilë. Numri i viktimave nga kjo masakër nuk bëhet ende i ditur", citon më tej komunikata. "Koalicioni opozitar sirian thekson rëndësinë thelbësore të ndalimit të Assadit dhe të gjithë atyre që kryen krime kundër njerëzimit në Siri", citon komunikata e opozitës siriane.

TEL AVIV - Kryeministri izraelit dekaroi sot se ''Tel Avivi do t'i përgjigjej me të njëjtën forcë çdo lloj sulmi të mundshëm në territorin izraelit''. ''Përballë çdo përpjekjeje për të na sulmuar, do të kundërpëgjigjemi dhe me forcën më të madhe të mundshme'', deklaroi Netanyahu, duke iu referuar sulmeve nga Siria. ''Shteti i Izraelit është i gatshëm dhe i përgatitur për çdo skenar të mundshëm'', theksoi ai. Netanyahu shtoi se ''Izraeli nuk ishte pjesë e luftës civile në Siri''. Kryeministri i bëri këto deklarata, të cilat u cituan nga të gjitha mediat vendase dhe të huaja, në përfundim të ''konsultimeve të sigurisë'' në shtabin e përgjithshëm të ushtrisë izraelite në Tel Aviv.

HermesNews - ©2013

Dërgo me email | Stampo artikullin