26/08/2013 16:38:03

Tiranë: Bashkia garante për biznesmenët: kredi për të rinjtë

Interesat e kredive, me garancinë e Bashkisë, që aplikohen për herë të parë variojnë nga 5 në 5.5%

TIRANË - Çdo i ri, biznes juridike dhe persona juridikë të liçencuar dhe ata të paliçencuar, duke nisur nga dita e sotme, mund të paraqiten pranë degëve të Bankës Kombëtare Tregtare për të aplikuar për kredi, me garancinë e Bashkisë së Tiranës.

Sipas drejtorit të Planifikimit strategjik, Ilir Dervishi, aplikuesi duhet të jetë patjetër i Tiranës, ndërkohë që interesat e kredive, me garancinë e Bashkisë, që aplikohen për herë të parë variojnë nga 5 në 5.5%.

"Në momentin që personat paraqiten pranë zyrave të BKT, ose mund të sjellin një kërkesë në Bashkinë e Tiranës, e cila referon personat përgjegjës, të kalojnë për të aplikuar më tej në BKT, duhet që minimumi për bizneset ekzistues, të kenë dy vjet operim në qytetin e Tiranës dhe të kenë një vazhdimësi të pagesave të taksave, të mos ketë kredi të këqija etj, ndërsa për bizneset e reja, çdo gjë fillon nga e para", tha Dervishi. Ai sqaroi se ato mund të licencohen dhe pas kësaj mund të aplikojnë në BKT ose të sjellin edhe një kërkesë që Bashkia ta ndihmojë.

Sipas tij, do të ngrihet edhe një komitet i kredisë që është i përbashkët midis BKT dhe Bashkisë së Tiranës. Risia e këtij program është që për bizneset e paliçencuara, të cilat mund të aplikojnë pranë BKT por deri në momentin e aprovimit të kredisë, mund të ndjekin të gjithë procedurat e nevojshme dhe pasi të jetë aprovuar kredia, nuk mund të disbursohet kredia në rast se ato nuk liçencohen ose regjistrohen pranë zyrave të Tatimeve dhe QKL.

“Kredia zgjat 36 muaj, nga momenti i disbursimit, ç’ka do të thotë që çdo muaj do të paguhet kësti dhe ka një përqindje prej rreth 5 %, në varësi të kolateralit ose biznesit apo individit që ka përballë dhe në momentin që këta persona nuk mund të paguajnë dot kredinë, banka ka mënyrat e veta”, tha Dervishi, sipas të cilit, me prioritet do të trajtohen ato biznese që hapin vende pune dhe sipërmarrëset femra. Sipas tij, përmes fondit të garancive, Bashkia e Tiranës synon të nxisë zhvillimin ekonomik dhe punësimin si dhe fuqizimin e të rinjve.

HermesNews - ©2013

Dërgo me email | Stampo artikullin