24/08/2013 16:14:26

Lagarde, dhuna pengon dialogun ne Egjipt

Plani i shpetimit nga FMN eshte ende larg

WASHINGTON - Drejtoresha e Përgjithshme e FMN-së, Christine Lagarde u shpreh dje se kushtet në Egjipt "nuk ishin arritur" për rifillimin e bisedimeve mbi një plan shpëtimi, për shkak të akteve të dhunës, që tronditën vendin pas largimit të presidentit Morsi. "Jemi krejtësisht të gatshëm të mbështesim popullin egjiptian në këtë periudhë tranzicioni, por kushtet nuk janë përmbushur", deklaroi shefja e Fondit Monetar Ndërkombëtar (FMN) në një intervistë në rrjetin televiziv Bloomberg TV. Në fund të vitit 2012, FMN-ja dhe Egjipti arritën një marrëveshje mbi një plan shpëtimi prej 4,8 miliardë dollarësh që nuk u akordua më pas për shkak të paqëndrueshmërisë politike në vend. Situata u përkeqësua edhe më tej gjatë 10 ditëve të fundit me represionin e përgjakshëm ndaj përkrahësve të presidentit të larguar në fillim të korrikut. Sipas Lagarde, arritja e "stabilitetit" dhe "mbështetjes" së qeverisë egjiptiane është e nevojshme që Fondi Monetar Ndërkombëtar të rifillojë diskutimet me autoritetet egjiptiane. "Nuk ka ardhur ende koha e përshtatshme", deklaroi ajo duke bërë të ditur se FMN-ja ishte e gatshme për të ndihmuar vendin. Ditën e hënë, kreu i diplomacisë saudite, princi Saud al-Fayçal, deklaroi se vendet arabe ishin të gatshme të kompensonin pjesën e ndihmës të shkurtuar nga perëndimi për Egjiptin.

HermesNews - ©2013

Dërgo me email | Stampo artikullin