20/08/2013 15:36:01

Fundoset anija: skuadrat shpëtojnë azilkërkuesit

Autoriteti australian i sigurisë detare (AMSA) u njoftua për ndihmë mëngjesin e sotëm përmes telefonit nga një person në bord

SYDNEJ - Ekipet e shpëtimit gjetën 106 persona, të cilët ishin në bordin e një anije, që transportonte azilkërkues, që u fundos në afërsi të ishullit Christmas, territor australian në mes të Oqeanit indian. Megjithatë, pesë persona rezultojnë të zhdukur.

Autoriteti australian i sigurisë detare (AMSA) është njoftuar për ndihmë mëngjesin e sotëm përmes telefonit nga një person në bord, kur anija ndodhej rreth 120 milje detare larg nga brigjet e ishullit Christmas. "Varka e shpëtimit mbërriti në vendngjarje për të shpëtuar të 106 personat, të cilët gjendeshin në bord", deklaroi zëdhënësi i agjencisë Asma (Accident scene management australian).

"Sipas informacionit të dhënë nga të mbijetuarit, mungojnë pesë persona, të cilët mund të kenë vdekur", shtoi ai. Kombësia e viktimave nuk bëhet e ditur, ndërkohë kërkimet u ndërprenë gjatë natës.

Kur ekipet e shpëtimit mbërritën në vendngjarje, anija pluskonte duke u mbytur pjesërisht. Shumë njerëz qëndronin në sipërfaqe të ujit. Çështja e azilkërkuesve, të cilët vijnë me anije të vjetra, është jashtëzakonisht e ndjeshme në Australi.

Sipas shifrave zyrtare, që nga fillimi i vitit 2013, tetëmbëdhjetë mijë persona kanë mbërritur në brigjet australiane, shpesh në ishullin e Krishtlindjeve. Në korrik, Qeveria laburiste u ka mbyllur dyert emigrantëve të paligjshëm, të cilët, në qoftë se mbërrijnë në Australi, do të dërgohen në Guineja e Re Papua. Aplikimet e refuzuara do t'i kthejnë emigrantët drejt vendit të tyre ose t'i deportojnë në vendet e botës së tretë.

HermesNews - ©2013

Dërgo me email | Stampo artikullin