16/08/2013 12:37:41

Rusia pengon turizmin ne Egjipt

Agjencia ruse për Turizmin u rekomandoi agjencive të udhëtimit të ndalnin shitjen e paketave turistike për në Egjipt

MOSKË - Autoritetet ruse u rekomanduan agjencive turistike të vendit të ndalnin shitjen e paketave turistike për në Egjipt, ndërkohë që mbi 50 000 të tilla janë shitur tashmë për periudhën e fundit të gushtit dhe vjeshtës, u shpreh sot një zyrtar i sektorit të turizmit.

Agjencia ruse për Turizmin u rekomandoi agjencive të udhëtimit të ndalnin shitjen e paketave turistike për në Egjipt deri në normalizimin e gjendjes në vend.

"Paketat turistike për në Egjipt janë të shitura deri në fund të shtatorit, duke përfshirë dhe një numër paketash për në tetor dhe fillimin e nëntorit", u shpreh Maja Lomidze, drejtuesja e Shoqatës së Agjencive Turistike ruse, cituar nga agjencia "Ria Novosti".

"Kostoja mesatare e paketave për person arriti në 600-700 dollarë. Në rast anulimi të udhëtimeve agjencitë turistike mund të raportojnë një deficit deri në 35 milionë dollarë", shtoi ajo.

Ministria ruse e Punëve të Jashtme u rekomandoi dje qytetarëve të mos udhëtonin drejt Egjiptit për shkak të trazirave të mundshme në zonat turistike. Më shumë se 50 000 turistë rusë ndodhen aktualisht në Egjipt, sipas Agjencisë ruse për Turizmin.

HermesNews - ©2013

Dërgo me email | Stampo artikullin