16/08/2013 11:40:05

Aksident në Durrës: dy viktima

Aksidenti ka ndodhur pranë fshatit Tapizë, 6 km larg Fushë Krujës

DURRËS - Dy persona kanë humbur jetën pas një aksidenti të rëndë natën e kaluar, kur tre autovetura u përplasën me njera-tjetrën në rrugën nacionale Fushë Krujë-Kamëz, bënë të ditur burime zyrtare nga drejtoria e policisë së qarkut të Durrësit.

Gjergj Nano, 28 vjeç, banues në Tiranë dhe Kastriot Jakaj, 42 vjeç, që drejtonin dy nga automjetet e përfshira në aksidentin e rëndë, kanë gjetur vdekjen e menjëhershme, ndërsa janë plagosur tre persona të tjerë, që fatmirësisht ndodhen në spitalin ushtarak jashtë rrezikut për jetën.

Burimet bënë të ditur emrat e të dëmtuarve, E. Lulja, 28 vjeç, banues në Tiranë, drejtues i automjetit të tretë; si dhe V. Muçaj e E. Murati, bashkëmoshatare 24-vjeçare, banuese në Tiranë, të cilat udhëtonin në automjetin e viktimës Gjergj Nano, dhe ishin të punësuara në klinikën dentare që ai kishte hapur në qytetin e Laçit.

Aksidenti ka ndodhur pranë fshatit Tapizë, 6 km larg Fushë Krujës, ndërsa ende nuk janë dhënë përfundimet lidhur me shkaqet e aksidentit me dy viktima.

HermesNews - ©2013

Dërgo me email | Stampo artikullin