15/08/2013 17:33:55

''Rabaa'': Tiananmeni i egjiptianeve

Arrin në 525 viktima bilanci i masakrës në Egjipt

(17:27) ''Rabaa'', sheshi ku protestojnë që prej një muaji e gjysmë mbështetësit e Morsit dhe arena e përleshjeve të përgjakshme të ndodhura dje në Kajro, është Tiananmeni i egjiptianëve, u shpreh me anë të një postimi në rrjetin social Twitter, zëdhënësi i "Vëllazërisë Myslimane", Gehad El-Haddad. Me anë të kësaj deklarate ai u shpreh shumë ashpër duke përvetësuar disa prej termave të përdorura nga media ndërkombëtare për të përshkrimin e situatës së përgjakshme të krijuar dje në këtë shesh.

Të paktën katër gazetarë kanë mbetur të vdekur dje në Kajro, ndër të cilët një kameraman i ''Skynews'', dy reportere dhe një koleg egjiptian, bëri të ditur sekretari i sindakatës egjiptiane të gazetarëve, Gamal Abdel Rehim, për televizionin publik egjiptian. Po ashtu sindikata egjiptiane përmes sekretarit të saj të përgjithshëm ka kërkuar hapjen e një hetimi lidhur me vrasjet dhe plagosjet e gazetarëve gjatë filmimit të trazirave, protestave, përleshjeve dhe gjakderdhjes së 24 orëve të fundit në Egjipt./

(17:11) Qindra protestues që mbështesin ish-presidentin Morsi, kanë sulmuar gjatë mesditës së sotme me shishe, me Molotov selinë e zyrave të guvernatorit të Gizës, në Kajro, njoftuan burime dëshmitare në vendngjarje. Dëshmitarët po ashtu theksuan se i gjithë kompleksi i ndërtesave është nën flakë dhe se situata është tej mase e dalë jashtë kontrolli.

(17:10) Kina u shpreh sot shumë e shqetësuar për situatën në Egjipt dhe bëri thirrje për vetëpërmbajtje pas operacionit të dhunshëm të ndërmarrë nga forcat egjiptiane të rendit ndaj militantëve të "Vëllazërisë Myslimane" si pasojë e përballjeve që shkaktuan qindra të vdekur në Egjipt. "Kina është thellësisht e shqetësuar për situatën në Egjipt", citon një deklaratë e Ministrisë kineze të Punëve të Jashtme. "Pekini shpreson që të gjitha palët do të vënë mbi të gjitha interesin e kombit dhe të popullit, duke treguar vetëpëmbajtjen më të madhe të mundshme për të shmangur viktima të tjera", citon më tej komunikata e ministrisë. "Kina këshillon gjetjen e një zgjidhjeje me anë të dialogut dhe konsultimeve në mënyrë që të rivendoset rregulli dhe stabiliteti social në Egjipt", thekson deklarata.

(17:09) Rritet edhe më tepër bilanci zyrtar, i konsideruar i rëndë i përleshjeve të dhunshme në Egjipt, në 525 të vdekur dhe mbi 3 500 të plagosur, sipas shifrave të publikuara pak minuta më parë nga Ministria egjiptiane e Shëdetësisë. ''Bilanci zyrtar i të vdekurve të shkaktuar nga përleshjet e dhunshme përfshinë dje të gjithë vendin arriti gjatë orës së fundit në 525 persona'', thuhej në komunikatën më të fundit të Minsitrisë egjiptiane të Shëndetësisë.

(17:00) Presidenti francez, François Hollande bëri thirrje pak më parë të bëhet gjithçka është e mundur për shmangien e një lufte civile në Egjipt, ku përleshjet e dhunshme shkaktuan mbi 460 të vdekur. "Kreu i shtetit theksoi se duhet bërë ç'të jetë e mundur për shmangien e luftës civile", thuhej në një komunikatë të Pallatit Elize, ku Hollande thirri sot ambasadorin egjiptian në Paris. "Franca mbështet gjetjen e një zgjidhjeje politike dhe organizimin e zgjedhjeve politike në mënyrë sa më të rregullt, konform angazhimeve të ndërmarra nga autoritetet egjiptiane të tranzicionit", theksohej në komunikatë.

KAJRO - Ministria egjiptiane e Shëndetësisë ka azhornuar pak më parë bilancin e viktimave të përleshjeve të djeshme në mbarë vendin, ku thekson se 464 persona, deri më tani, kanë mbetur të vdekur ndër të cilët 421 janë civilë, po ashtu këtyre u shtohen edhe 43 policë të vrarë, sipas ministrisës së Brendshme. Një total prej 3 572 personash janë plagosur në të gjithë vendin, sipas shifrave të ministrisë së Shëndetësisë. Sipas bilancit, rreth 200 persona kanë vdekur në sheshet ''Rabaa al-Adawiya'' dhe ''Nahda'', në Kajro, që janë okupuar që prej një muaji nga e gjysmë nga mbështetësit e presidentit islamik të ish-presidentit, Mohamed Morsi, të larguar nga pushteti që prej 3 korrikut.

HermesNews - ©2013

Dërgo me email | Stampo artikullin