13/08/2013 12:30:55

Euro rregjistron vlerën më të ulët të vitit

Kriza ndikon në të ardhurat nga emigrantët dhe nga turizmi

TIRANE - Efekti i pushimeve verore në kursin e këmbimit të lekut me euron këtë vit është shumë i zbehtë. Monedha e përbashkët europiane sot këmbehej me 139.8 lekë, vlera më e ulët e regjistruar gjatë këtij viti.

Mesatarisht, që nga 15 Korriku e deri më sot, euro është këmbyer me 140.2 lekë. Këto shifra janë ndjeshëm më të larta krahasuar me të njëjtën periudhë të një viti më parë.

Kursi mesatar për periudhën 15 Korrik -13 Gusht vjet ishte 137.3 lekë, ndërsa vlera minimale për të njëjtën periudhë ishte 137 lekë. Megjithatë, ekspertët shprehen se, duke pasur parasysh nivelet ku ka qënë kursi i këmbimit më herët gjatë këtij viti, sezoni përsëri ka sjellë një forcim të lekut.

Fakti që këtë vit monedha kombëtare është larg forcimit të viteve të mëparshme është sinjal i prurjeve më të vogla valutore hyrëse. Kriza duket të ketë ndikuar në të ardhurat nga emigrantët dhe nga turizmi, dy faktorët përcaktues që ndikonin në rritje të ofertës për euro dhe në forcimin e lekut.

HermesNews - ©2013

Dërgo me email | Stampo artikullin