08/08/2013 18:57:39

Day 5: shteti sot funksionoi (Shqiperia është dhe kjo)

nga Doriana Metollari

HermesNews - Meqë opinioni publik ngulet 24 orë në 24 vetëm me lajme që flasin për dhunë, korrupsion, sharje e kundërsharje ndjej se është korrekte të bëj publik një fakt që flet për një Shqipëri tjetër. Në këto raste shteti funksionon, dmth u përgjigjet kërkesave të qytetarëve dhe nuk luan si macja me miun kur taksapaguesit kërkojnë shërbime.

Pas një lumi fjalësh të tipit, "këta duan lekë" që unë më tepër i quaj paragjykime, sepse nuk pashë t'u kërkonte njeri lekë, ujësjellësi Shkodrës riparoi një defekt të shkaktuar nga firma ''Albstar'' e cila po shtron rrugët në një prej lagjeve të qytetit. Në fakt proçedura e do, të shtrojë rrugët pa prishur ujërat, por banorët e dinë çfarë do të thotë të riparosh diçka e të shkatërrosh diçka tjetër.

Gjithsesi, ngjarja e zakonshme, është një reflektim mbi një mentalitet që i centralizon zgjidhjet në duart e një personi të vetëm, që ushtron një funksionon publik dhe që paguhet nga taksapaguesit. Kaq i duhet një sistemi si ky që të fundosë demokracine dhe shërbimin e shtetit, gjithnjë e më shumë.

Unë e quaj një problem mentaliteti dhe edukimi. Dhe zgjidhja nuk vjen asnjëherë nëse njerëzit presin që shteti duhet të ndërhyjë pa e kërkuar ata një gjë të tillë. Nëse qytetarët nuk fillojnë të ndryshojnë mekanizmin e të menduarit asnjë lider apo parti nuk mund të bëjë ndryshimin.

Unë shoh që ky sistem është në grahmat e fundit dhe mbi të gjitha ka një problem të madh, në mënyrën e të menduarit. Por them se përmbi rregullat e përgjithshme që liderët mund të vendosin mbi njerëzit, në bazë qëndron gjithnjë një shkëndije që do të mund t'i ndriçojë mendjen e secilit. Media.

HermesNews - ©2013

Dërgo me email | Stampo artikullin