07/08/2013 11:10:23

Ulen eksportet blegtorale: të huajt i kërkojnë më pak

Kërkesa e vendeve fqinje për produktet blegtorale me orgjinë shqiptare ka rënë me 63%

TIRANE - Tregtia e produkteve blegtorale gjatë 6-mujorit të parë të këtij viti ka rezultuar me bilanc negativ. Ndryshe nga performanca pozitive e produkteve bujqësore, krahasuar me të njëjtën periudhë të një viti më parë, vihet re se kërkesa e vendeve fqinje për produktet blegtorale me orgjinë shqiptare ka rënë me 63%.

Kjo shifër përkthehet në më pak të ardhura për fermerët që punojnë në këtë sektor. Sipas shifrave zyrtare të Ministrisë së Bujqësisë, rënia e tregtisë me jashtë e prodhimeve në blegtori ka sjellë një humbje prej 545 milionë lekë të ardhura.

Në total për vitin 2012 në këtë periudhë u realizuan 870 milionë lekë të ardhura, ndërsa këtë vit kjo vlerë ka vajtur në rreth 325 milionë lekë. Gjatë kësaj periudhe janë eksportuar 58 mijë krerë bagëti të ndryshme me vlerë 59 milionë lekë, i vetmi zë në këtë sekotor që rezulton me rritje.

Ndërsa eksporti i zërit "të brendshme mishrash" ka pasur rënie për këtë gjashtë mujor, ku janë shitur vetëm 16 ton, nga 326 të një viti më parë dhe që arrijnë vlerën e rreth 36.4 milionë lekëve nga rreth 318.5 milionë.

Po ashtu, ka pasur rënie të ndjeshme të numrit të vezëve të eksportuar në rajon e më gjerë, nga rreth 27 mijë të një viti më pare, kjo shifër ka shkuar në 8 mijë këtë vit, me një vlerë prej 55.3 milionë lekësh. Ndërsa, eksporti i mjaltit është rritur në vlera minimale 0.1 për qind këtë gjashtë mujor, nga 5 ton që është shitur vitin e kaluar, në 7 ton.

Rënia e eksporteve blegtorale është një tregues negativ për zhvillimin ekonomik të vendit dhe konkretisht të zonave rurale, të cilët fushën e bujqësisë dhe blegtorisë e kanë mjetin e vetëm të jetësës. Rënia e importeve në këtë sektor ka rezultuar në masën 16 %, çka tregon edhe rënie të konsumit.

HermesNews - ©2013

Dërgo me email | Stampo artikullin