07/08/2013 10:43:38

Cfarë kërcënon demokracinë në EU ?

Elitarizmi dhe populizmi kërcënojnë lirinë e qytetarëve europianë

ATHINË - Filozofi gjerman, Jurgen Habermas paralajmëroi dje në Athinë për rrezikun që paraqiste rritja e populizmit në Europë duke argumentuar mbi nevojën e ndryshimit të politikës së elitarizmit në Bashkimin Europian, gjatë kongresit të 23-të botëror të filozofisë që mbahet për herë të parë në djepin e kësaj disipline, në Greqi.

"Duhet të distancohemi nga projekti i elitarizmit të klasave të sotme politike të Europës duke rritur përfshirjen e qytetarëve në dialogun mbi çështjen europiane", deklaroi Habermas, 84 vjeç. "Nëse nuk arrijmë ta bëjmë këtë, partitë populiste do të fitojnë zgjedhjet europiane në maj të vitit 2014", shtoi ai.

"Nuk jam politikan, por mendoj se populizmi është i rrezikshëm. Nacionalizmi nuk ishte problematikë e hasur vetëm gjatë shekujve XIX dhe XX, por vazhdon të jetë i pranishëm në të gjithë vendet", theksoi Habermas.
"Në Gjermani, populizmi është për momentin joaktiv, por mund të rizgjohet dhe për këtë arsye duhet të qëndrojmë vigjilentë", deklaroi ai.

"Në reformat institucionale në Europë duhet të marrin pjesë edhe qytetarët. Nëse nuk ndodh diçka e tillë, atëherë le t'i themi lamtumirë demokracisë ", nënvizoi filozofi. Ai kritikoi rolin e medias, e cila në përgjithësi trajton së tepërmi çështje kombëtare dhe deformon ngjarjet, duke krijuar tensione mes vendeve anëtare të BE-së. I pyetur mbi krizën, ai u shpreh se vendet si Greqia dhe Italia duheshin mbështetur me investime dhe zbatimin e politikave të koordinuara.

HermesNews - ©2013

Dërgo me email | Stampo artikullin