06/08/2013 09:33:39

Politika e përgjegjshme e Metës

LSI kërkon nga Partia Demokratike modelin e të bërit opozitë në Shqipëri: financat publike, transparencë për publikun

TIRANE - Ilir Meta e sheh me sy realist fillimin e qeverisjes, vështirësitë dhe sfidat e zhvillimit ekonomik. "Programi do të bëhet publik në kohën e duhur, në radhë të parë nga Kryeministri i ardhshëm dhe kabineti qeveritar", tha Ilir Meta në një intervistë për mediat, gjatë të cilës pranon dhe që "financat janë në një gjendje shumë të vështirë". Meta bën ftesë për "një opozitë konstruktive" ashtu si dhe "për një qeveri të re". Për hir të transparencës Meta tha se Ministritë që drejtoi LSI sot nuk janë më të saj në një kohë kur PS ka qenë shumë kritike ndaj tyre.

"Do të bëjmë çdo gjë për të bashkëpunuar me opozitën në funksion të interesave kombëtare, të integrimit europian të vendit dhe besoj që dhe Partia Demokratike të ruajë koherencën e saj...një opozitë konstruktive që të mos kthehet në modelin e të bërit opozitë në Shqipëri", tha Meta që përfshiu dhe një urim për një "stil të ri të Lulzim Bashës".

LSI ruan distanca nga punët e brendshme të Partisë Demokratike dhe Socialiste. E megjithatë gjuha shkon aty ku dhëmb dhe financat janë tema më delikate e verës, por LSI flet me progamin e ri elektoral dhe pranon degradimin e financave publike, por garanton se "publikut do t’i jepet transparencë e plotë e situatës aktuale financiare në vend". //HermesNews - ©2013//

Doriana Metollari

Dërgo me email | Stampo artikullin