03/08/2013 18:50:36

SHBA mbyll ambasadat: shkak, kercenimet e Al-Kaedas

Departamenti amerikan i Shtetit u paralajmërua për kërcënime aq të rënda sa vendosi mbylljen e 21 ambasadave dhe konsullatave në Afrikën e veriut, Lindjen e Mesme dhe Azinë qendrore

WASHINGTON - Rikthehet frika nga aktet terroriste të Al-Kaedës për ambasadat dhe turistët, pak javë para përvjetorit të parë të masakrës së Bengasi-t, ku më 11 shtator vdiq ambasadori i SHBA në Libi dhe tre persona të stafit të tij.

Nesër, vigjilenca pritet të jetë maksimale. Departamenti amerikan i Shtetit u paralajmërua për kërcënime aq të rënda sa vendosi mbylljen e 21 ambasadave dhe konsullatave në Afrikën e veriut, Lindjen e Mesme dhe Azinë qendrore.

Por e gjithë vëmendja është zhvendosur në Jemen, ku edhe Britania e Madhe vendosi të mbyllte ambasadën e saj nesër dhe të hënën. Një burim nga Shtëpia e Bardhë njoftoi se vetë presidenti, Obama urdhëroi ekipin e tij të Sigurisë Kombëtare të merrte të gjitha masat e nevojshme për mbrojtjen e jetës së shtetasve amerikanë.

Jo rastësisht, edhe Departamenti amerikan i Shtetit paralajmëroi shtetasit amerikanë të mos udhëtojnë në këto rajone gjatë gushtit. Kjo klimë vigjilence mund të përfshijë edhe selinë diplomatike amerikane në Romë.

"Me kërkesë të Departamentit amerikan të Shtetit, qindra marinsa do të jenë në gatishmëri për të garantuar sigurinë gjatë ditës së nesërme, në ambasadat amerikane në Itali, Spanjë dhe vendet e tjera të Evropës jugore dhe Afrikës veriore", njoftoi CNN.

HermesNews - ©2013

Dërgo me email | Stampo artikullin