02/08/2013 14:52:15

A do të mbijetojë qeveria italiane ?

''Qeveria është tashmë një i vdekur që ec'', titulli kryesor i së përditshmes Il Fatto quotidiano

ROMË - Dënimi me burgim i ish-kryeministrit italian, Silvio Berluskoni vuri nën presion koalicionin e brishtë në pushtet mes së majtës e së djathtës, përveç vënies së interesave të tij në një status-quo. "Qeveria është në rrezik", shkruante sot në faqen e parë e përditshmja italiane "Il Messaggero".

"Qeveria është tashmë një i vdekur që ec", ishte titulli kryesor i së përditshmes "Il Fatto quotidiano". "Pyetja se çfarë do të ndodhë më pas është e pranishme vazhdimisht në mjediset politike, por për momentin mbetet pa përgjigje", citon një shkrim i analistit Carlo Fusi të së përditshmes "Il Messaggero".

Meqenëse Berluskoni nuk do të mundet të kandidojë gjatë zgjedhjeve të ardhshme si pasojë e dënimit të tij me gjashtë vjet burg, ai do të kishte më shumë interes në ruajtjen e postit të senatorit deri në legjislaturën e ardhshme të vitit 2018, duke shmangur zgjedhjet e parakohshme të shkaktuara nga një rënie e mundshme e qeverisë.

Me sa duket, ai vë në plan të parë mbarëvajtjen e qeverisë, duke u përpjekur të qetësojë gjakrat në partinë e tij dhe të shmangë dorëheqjet në masë të ministrave të tij. "Problemet e Silvio Berluskonit me drejtësinë nuk do të përbëjnë shqetësim për qeverinë", deklaroi Mara Carfagna, një figurë e moderuar e partisë së tij.

"Nëse ish-kryeministri vendos të shpëtojë qeverinë atëherë ai do ta kalojë me dinakëri tek Partia Demokratike italiane përgjegjësinë e vazhdimit të bashkëpunimit me një aleat të djathtë kryetari i së cilës është i dënuar nga drejtësia", citon shkrimi i analistit të së përditshmes së moderuar italiane "La Stampa", Marcello Sorgi.

Krahu i majtë i Partisë Demokratike italiane dyshon në zgjatjen artificiale të kësaj aleance. "Është e pamundur të imagjinohet që Partia Demokratike të vazhdojë të jetë aleate e partisë së Berluskonit", theksoi kryetari i partisë së majtë Sinistra e Liberta, Nichi Vendola.

Ndërkohë kryeministri italian, Enrico Letta, bëri mbrëmë thirrje për qetësi gjatë kësaj faze kritike për ekonominë e Italisë. "Për të mirën e vendit, nevojitet që, duke përfshirë edhe bisedimet brenda forcave politike, të mbizotërojë një klimë e qetë", theksoi kryeministri italian, Letta.

Përveç qeverisjes, është në lojë edhe e ardhmja politike e ish-kryeministrit, Berluskoni. "Dënimi e vendos ish-kryeministrin në kufijtë e jetës parlamentare duke e përjashtuar atë plotësisht prej saj. Që prej ditës së sotme, Italia ka hyrë në periudhën post-berluskoniane", shkruajti në një koment, Stefano Folli analist i së përditshmes "Il Sole-24 Ore".

I dënuar me katër vjet burg, tre prej të cilave mbulohen nga një amnisti, Berluskoni nuk do ta vuajë dënimin në burg për shkak të moshës së madhe, por do të duhet të zgjedhë në mesin e tetorit midis arrestit shtëpiak dhe punës komunitare.

HermesNews - ©2013

Dërgo me email | Stampo artikullin