01/08/2013 21:01:24

Denohet Berlusconi

Ish Kryeministri Italian denohet nga Gjykata e Milanos

MILANO - Gjykata e Kasacionit në Itali la në fuqi vendimin e Gjykatës së Apelit të Milanos që e dënon me 4 vite burg, Silvio Berluskonin për evazion fiskal që lidhet me çështjen "Mediaset".

"Silvio Berluskoni nuk del fitimtar nga gjykata", shkruan Corriere Della Sera.
Më 8 Maj të këtij viti, Gjykata e Apelit në Milano konfirmoi vendimin e Shkallës së Parë për dënimin e Silvio Berlusconit me katër vjet heqje lirie e ndalimin për pesë vjet të detyrave në poste publike nga ana e tij.

Por në këtë rast, Berluskoni nuk do të përfundojë asnjë vit pas hekurave. Tre nga nga katër vitet e dënimit i falen në bazë të uljes së dënimeve të dekretuar në 2006-ën. Vitin e mbetur ai do ta kalojë në arrest shtëpie sepse përfiton nga mosha mbi 70-vjeçare.

Ish-kryeministri u akuzua për një shkelje fiskale prej 7,3 milionë eurosh të kryer duke manipuluar çmimet e filmave të blerë nga "Mediaset". Rishqyrtimi i dënimit për ndalimin e ushtrimit të detyrës në postet publike pritet të shmangë një tërmet të mundshëm në qeverinë italiane.

Nëse Berluskoni nuk do të mund të jetë më deputet dhe forca politike e drejtuar prej tij, dhe forcat e tjera që e mbështesin, mund të krijojnë një termet të vërtetë politik, me dorëheqjen masive të deputetëve të tyre dhe humbjes së mbështetjes për qeverinë Letta.

HermesNews

Dërgo me email | Stampo artikullin