01/08/2013 15:19:38

Moska: SHBA po bllokon ekonomine iraniane

Sanksionet në fjalë duhet të miratohen nga Senati amerikan

MOSKË - Rusia akuzoi sot SHBA se po përpiqej të bllokonte ekonominë e Iranit, pas miratimit të sanksioneve të reja të Uashingtonit ndaj republikës islamike e cila akuzohet për zotërimin e armëve bërthamore.

"Këshilli i Sigurisë së OKB-së ka adoptuar tashmë disa rezoluta mbi sanksionet ndaj Iranit, gjë që ishte e përshtatshme dhe e mjaftueshme për të siguruar mospërhapjen e armëve të shkatërrimit në masë", deklaroi një prej zëvendësministrave rus të Punëve të Jashtme, Guennadi Gatilov, cituar nga agjencia "Interfax". "Çdo sanksionim i mëtejshëm do të çojë drejt bllokimit të ekonomisë së Iranit, dhe jo drejt zgjidhjes së duhur për sigurimin e mospërhapjes", nënvizoi ai.

Dhoma amerikane e Përfaqësuesve miratoi dje disa sanksione të reja ndaj Iranit që parashikonin vendosjen e kufizimeve strikte për industrinë iraniane të naftës si dhe për sektorë të tjerë të ekonomisë si ai i minierave dhe prodhimit të automjeteve. Sanksionet në fjalë duhet të miratohen nga Senati amerikan dhe më pas nga presidenti Obama para se të hyjnë në fuqi.

HermesNews - ©2013

Dërgo me email | Stampo artikullin