30/07/2013 20:39:10

Hoxha: Aktualisht PD e ndarë në dy pjesë, pro dhe kundër Bashës

Deputeti Hoxha tha se është detyrë e kryetarit të ri të organizojë Partinë të ofrojë vlerat më të mira në këtë parti për të shmangur çarjen e mëtejshme të kësaj partie

TIRANE - Deputeti I Partisë Demokratike Fatos Hoxha ka qenë edhe më radikal se disa ditë parë pas zgjedhjes së Lulzim Bashës si kryetar I kësaj partie. I ftuar dje bashkë me disa deputetë të tjerë në emisionin “DEBATI NË CHANNEL ONE” të gazetarit Roland Qafoku.

Hoxha tha se Partia Demokratike aktualisht është e ndarë dhe e çarë në dy pjesë, një pjesë që mbështet Lulzim Bashën dhe një pjesë që nuk e mbështet atë. Deputeti Hoxha tha se është detyrë e kryetarit të ri të organizojë Partinë të ofrojë vlerat më të mira në këtë parti për të shmangur çarjen e mëtejshme të kësaj partie.

Hoxha shkoi më tej kur kritikoi nënkryetarin e PD Astrit Patozi, që sipas tij, nuk I ka bërë më parë publike problemet në parti por vetëm pas humbjes së Olldashit. Hoxha bëri publike edhe një takim personal më kryeministrin Sali Berisha përpara nisjes së fushatës së zgjedhjeve 23 qershorit në të cilin evidentoi disa probleme kardinale në PD, por që sipas Hoxhës Berisha e dëgjoi por nuk I mori parasysh asnjë fjalë. Hoxha bëri publike gjithashtu edhe sulmet që I kanë ardhur këto ditë në rrjetet sociale nga eksponentë të PD për kritikat që ai ka bërë. Por, ndërkohë gjatë emisionit, Hoxhën e kundërshtuan dy deputetët e tjerë, nga themeluesit e PD.

I pari, Gjok Uldedaj tha se vota për Lulzim Bashën si kryetar ishte në të njëjtën kohë edhe votë kundër qeverisjes dhe ministrave të PD, por sipas tij kjo nuk do të thotë se PD është e ndarë dhe e çarë. “PD do të dijë të ringrihet dhe të rikthehemi pas 4 vjetësh në pushtet”, tha Uldedaj. Ndërkohë, Luan Skuqi, politikani që koleksionon 5 mandate si deputet që nga vitit 1991 nën siglën e PD, e vlerësoi zgjedhjen e Bashës si kryetar duke e cilësuar atë politikanin më të denjë brenda PD për të bërë riorganizimin e madh.

Channel One

Dërgo me email | Stampo artikullin