30/07/2013 18:49:35

TAP mblidhet 7.6% më shumë se vjet

Katërmbëdhjetë miliardë Lekë në gjashtë muaj

TIRANE - Tatimi mbi të ardhurat personale, (Tap) një nga taksat kryesore me ndikim në buxhetin e shtetit po pëson rritje cdo muaj, duke ndikuar pozitivisht në të ardhurat buxhetore. Në këtë 6-mujor kjo taksë është rritur 7.6% më shumë se vjet.

Sipas të dhënave të ministrisë së Financave për treguesit fiskalë Janar -Qershor nga kjo taksë janë mbledhur 14 miliardë lekë, duke tejkaluar planifikimin në fillimvit, që parashikonte një shumë 12-13 miliardë lekë.

Kjo rritje tregon interesim të pagesës për këtë taksë nga persona të punësuar në sektorët privatë dhe publikë. Tap-i llogaritet në një taksë në nivelin 10% të pagës nga punësimi apo fitime nga aktivitete të ndryshme vetjake.

Që nga data 1 Maj këtë taksë nuk e paguajnë 220 mijë punonjës, që marrin pagë deri ne 30 mije leke/muaj, c’ka ndikon në buxhetin e shtetit me një faturë prej 2.5 miliardë lekë.

HermesNews - ©2013

Dërgo me email | Stampo artikullin