28/07/2013 11:06:44

''Akropoli'': zbulohet rrjeti i trafikut në Greqi

Policia greke arreston 18 persona për trafik qëniesh njerëzore

ATHINË - Policia greke përfundoi me sukses një operacion kundër trafikimit dhe shfrytëzimit të qenieve njerëzore. Në operacionin me emrin e koduar "Akropoli" u vunë në pranga 18 persona dhe u liruan 20 viktima të trafikut, nga të cilët 14 gra të huaja që detyroheshin të prostituonin dhe gjashtë burra.

Policia ka shpallur në kërkim dhe 19 persona të tjerë në Greqi dhe jashtë saj, që ndodhen nën të njëjtën akuzë. Rrjeti trafikonte persona nga Republika Domenikane, me destinacion vendet e Evropës, veçanërisht Spanjën dhe Italinë.

Kjo organizatë, që kishte degë në Republikën Domenikane, Spanjë, Turqi e Greqi, i joshte viktimat duke iu premtuar punë në Spanjë. Tranzicioni ilegal kryhej nga Greqia, ku edhe shfrytëzoheshin për prostitucion e drogë e më pas viktimat shkonin në Spanjë e Itali.

Policia greke sekuestroi edhe një sasi parash, dhjetëra celularë, disa kompjutera, dokumente dhe bileta udhëtimi.

HermesNews - ©2013

Dërgo me email | Stampo artikullin