26/07/2013 13:03:10

Kajro: Morsi akuzohet për spiunazh

Ish presidenti Egjiptian vendoset në paraburgim

(21:49) Dy egjiptianë kanë mbetur të vdekur sot, në Aleksandri, gjatë përleshjeve mes përkrahësve dhe kundërshtarëve të presidentit të rrëzuar islamik, Mohamed Morsi, bënë të ditur burime zyrtare vendase.

"Për më tepër, rreth 20 persona u plagosën në Aleksandri, në veri të Egjiptit", theksuan burimet zyrtare vendase. Burimet zyrtare egjiptiane njoftuan më parë për 15 të plagosur. "Përleshjet në lagjen Choubra, në Kajro, shkaktuan gjithashtu rreth 10 të plagosur", shtuan burimet zyrtare vendase.

(13:50) Organizata "Hamas", në pushtet në Gaza, denoncoi sot vendimin e një gjykate në Kajro për baraburgimin e presidentit të rrëzuar egjiptian, Mohamed Morsi nën akuzën e një bashkëpunimi të mundshëm me lëvizjen palestineze. "Hamasi e dënon këtë vendim të bazuar në postulatin se lëvizja jonë është armiqësore. Ky është një zhvillim i rrezikshëm që konfirmon se pushteti aktual në Egjipt ka hequr dorë prej kauzave kombëtare si dhe prej kauzës palestineze", deklaroi zëdhënësi i "Hamas"-it, Sami Abu Zuhri.

(13:44) Vendimi i organeve të drejtësisë për paraburgimin e presidentit të rrëzuar egjiptian, Mohamed Morsi në lidhje me ngjarjet e ditëve të fundit të regjimit të ish-presidentit, Hosni Mubarak, risjell ish-regjimin e tij në pushtet, deklaroi sot "Vëllazëria Myslimane". "Akuzat ndaj Morsit tingëllojnë si një hakmarrje e ish-regjimit, gjë që tregon rikthimin e tij të fuqishëm", u shpreh zëdhënësi i lëvizjes, Gehad el-Haddad.

KAJRO - Presidenti i rrëzuar egjiptian, Mohamed Morsi u vendos në paraburgim për një periudhë 15-ditore nën akuzën e spiunazhit për llogari të organizatës terroriste "Hamas" dhe arratisjeve në masë nga burgjet gjatë revolucionit të vitit 2011, njoftoi agjencia zyrtare egjiptiane e lajmeve, MENA.

HermesNews - ©2013

Dërgo me email | Stampo artikullin