25/07/2013 17:27:38

Përplasen automjetet në aksident: dy plagosje

Aksi rrugor Elbasan - Librazhd javët e fundit është kthyer në burim aksidentesh

ELBASAN - Një aksident me pasojë plagosjen lehtë të dy personave ka ndodhur sot në aksin rrugor Elbasan - Librazhd në vendin e quajtur Labinot - Fushë, aks rrugor i cili javët e fundit është kthyer në burim aksidentesh si pasojë e rrugës së drejtë, ku drejtuesit e mjeteve shtojnë shpejtësinë. Në aksidentin e sotëm janë përplasur dy mjete, njëri tip Opel me targë TR 069 C me drejtues Vath Vargaj dhe tjetri tip Fiat me targë TR 2793 T, ku emri i drejtuesit ende nuk konfirmohet nga Policia. Sipas burimeve policore, mjeti tip Opel udhëtonte nga Elbasani në drejtim të Librazhdit dhe mjeti tjetër anasjelltas. Policia paraprakisht konfirmon se shkak i aksidentit ka qenë shpejtësia e të dy mjeteve çka ka shkaktuar edhe humbjen e kontrollit të njërit prej tyre, duke sjelle edhe përplasjen. Dy drejtuesit e mjeteve u dërguan në spitalin kirurgjik të Elbasanit dhe pasi kanë marrë ndihmën e parë mjekësore janë jashtë rrezikut për jetën.

HermesNews - ©2013

Dërgo me email | Stampo artikullin