25/07/2013 13:05:32

Fillon samiti i Ballkanit Perendimor

Prania e krerëve të shteteve të Kosovës dhe Serbisë dëshmon progres në përmirësimin e marrëdhënieve midis dy vendeve

LUBJANË - Një samit jozyrtar i vendeve të Ballkanit Perëndimor, me pjesëmarrjen e shteteve të ish-Jugosllavisë dhe Shqipërisë, ku do të diskutohen marrëdhëniet me BE-në, u hap sot në mëngjes në Bërdo pri Kranju, në afërsi të Lubjanës, me praninë e presidentit francez, François Hollande si i ftuar nderi.

Ky samit jozyrtar i paprecedentë i krerëve të shteteve të Ballkanit Perëndimor, u organizua me iniciativë të presidentit slloven, Borut Pahor, dhe atij kroat, Ivo Josipoviç, duke qenë se Sllovenia dhe Kroacia janë dy vendet e vetme të ish-Jugosllavisë tashmë të integruara në BE.

Krerët e shteteve të Serbisë, Tomisllav Nikoliç, të Kosovës, Atifete Jahjaga, të Malit të Zi, Filip Vujanoviç, të Bosnje-Hercegovinës, Zheljko Komshiç, Maqedonisë, Gjorge Ivanov, iu përgjigjën ftesës slloveno-kroate, ashtu si dhe kreu i shtetit shqiptar, Bujar Nishani.

Samiti jozyrtar dëshmon gatishmërinë e vendeve të Ballkanit perëndimor për mirëorganizimin e marrëdhënieve me BE. Gjithashtu, prania e krerëve të shteteve të Kosovës dhe Serbisë dëshmon progres në përmirësimin e marrëdhënieve midis dy vendeve.

HermesNews - ©2013

Dërgo me email | Stampo artikullin