25/07/2013 11:22:12

Thirrje për konsum në Greqi

Përballë kritikave që mbronin faktin se hapja e dyqaneve të dielave nuk do të ndryshonte fuqinë blerëse të popullit, zëvendësministri Thanasis Skordhas theksoi konsumin në rritje në Greqi duke marrë si shembull shitjet e larta të aparateve celularë tip 'smartphone'

ATHINË - Zv.ministri grek i zhvillimit shkaktoi zemërim gjatë debatit të djeshëm parlamentar mbi hapjen e zgjatur të dyqaneve ditën e diel duke mbrojtur me pasion të drejtën e bashkëqytetarëve të tij për konsum edhe pse ata marrin një rrogë prej 500 eurosh.

''Përballë kritikave që mbronin faktin se hapja e dyqaneve të dielave nuk do të ndryshonte fuqinë blerëse të popullit, zëvendësministri Athanasios Skordas theksoi konsumin në rritje në Greqi duke marrë si shembull shitjet e larta të aparateve celularë tip smartphone gjatë viteve të fundit, pavarësisht krizës", njoftoi agjencia greke e lajmeve, ANA.

"Ajo që dua të them është se askush nuk mund t'i diktojë konsumatorit atë që mund të blejë me rrogën e tij prej 500 eurosh. Është puna e tij nëse i shpenzon paratë për një 'smartphone' apo për kulturën e tij", u shpreh zëvendësministri.

Ai theksoi se Greqia ankohej për vuajtje dhe mjerim, në vend që të vazhdonte me hapjen e dyqaneve me orare sipas dëshirës së konsumatorëve.

Projektligji u miratua nga shumica e parlamentarëve. Ai parashikonte se përveç shtatë të dielave tashmë të vendosura për hapjen e dyqaneve, autoriteteve lokale do t'u jepej një afat tremujor për vendosjen e të dielave të tjera gjatë të cilave dyqanet do të qëndrojnë hapur.

Projektligji hasi në kundërshtinë e sindikatave, kishës dhe tregtarëve të vegjël, sipas të cilëve vetëm rrjetet e mëdha të dyqaneve do të përfitonin nga kjo reformë.

Të ardhurat e qytetarëve grekë janë u goditën rëndë nga recesioni që mundon vendin prej më shumë se gjashtë vjetësh si dhe nga masat e kursimit.

Sipas një studimi të OKB-së, më shumë se një në tre qytetarë jetojnë në varfëri. Rroga minimale është ulur në 580 euro.

HermesNews - ©2013

Dërgo me email | Stampo artikullin