23/07/2013 22:27:55

OSBE e shqetësuar për dëshminë e detyruar të gazetarit në proçes

''Qeveria duhet të mbrojë të drejtën e gazetarëve për ruajtjen e burimeve të tyre, si një prej parimeve kyçe të gazetarisë investigative''

VJENË - Organizata për Sigurinë dhe Bashkëpunimin në Europë, OSBE, shprehu sot shqetësimin mbi detyrimin e një gazetari për të dëshmuar në një proces penal, me anë të një letre drejtuar sekretarit amerikan të Drejtësisë, njëkohësisht edhe prokuror i përgjithshëm i vendit, Eric Holder.

"Kam frikë se kjo do të prodhojë efekte negative përsa i përket hetimit të çështjeve të ndjeshme nga gazetarët", u shpreh përfaqësuesja e OSBE-së për lirinë e medias, boshnjakja Dunja Mijatoviç.

Në letrën e saj, Mijatoviç denoncoi tre shkeljet e kohëve të fundit të të drejtave të gazetarëve amerikanë. Ajo i kërkoi Departamentit amerikan të Drejtësisë, të rishikonte rastin e James Risen, gazetarit investigativ të së përditshmes "New York Times" si dhe të respektonte të drejtat e gazetarëve për mbrojtjen e burimeve të tyre.

"Qeveria duhet të mbrojë të drejtën e gazetarëve për ruajtjen e burimeve të tyre, si një prej parimeve kyçe të gazetarisë investigative", shtoi ajo, duke propozuar hartimin e një ligji mbi çështjen.

OSBE denoncoi gjithashtu vendimin e një gjykate apeli në SHBA, sipas të cilit amendamenti i parë i kushtetutës amerikane nuk autorizon gazetarët të ruajnë burimet e tyre nëse bëhet fjalë për çështje penale.

HermesNews - ©2013

Dërgo me email | Stampo artikullin