20/07/2013 18:09:50

Greqi: shpërthim i fortë në shtëpinë e prokurorit

Prokurori, i cili mbrohej nga forcat e rendit, nuk ndodhej në banesë

ATHINË - Një shpërthim i fortë, i dyshuar fillimisht nga policia si sulm me bombë, shkaktoi sot në mëngjes dëme të konsiderueshme materiale, pa bërë viktima, në shtëpinë e një prokurori në qendër të Larissa-s, njoftoi agjencia greke e lajmeve, ANA. Sipas të njëjtit burim, prokurori, i cili mbrohej nga forcat e rendit, nuk ndodhej në banesë në momentin e shpërthimit të ndodhur pak pas orës 04:00 të mëngjesit. "Shpërthimi shkaktoi thyerjen e xhamave të dritareve në banesat përreth, dëmtimin e disa automjeteve, dhe mureve të shtëpive në një rreze prej 80 metrash", citon e përditshmja lokale, "Eleftheria". Dje, shoqata profesionale e gjyqtarëve dhe prokurorëve grekë, kërkoi një përforcim të mbrojtjes së këtyre funksionarëve, si pasojë e rreziqeve me të cilat ata përballeshin. Ky ishte një reagim ndaj atentatit të mbetur në tentativë të mërkurën, kur u çaktivizua një pako me bombë artizanale e vendosur para gjykatës së shkallës së parë në Athinë.

HermesNews - ©2013

Dërgo me email | Stampo artikullin