20/07/2013 11:07:37

Kontroll për mallrat ushqimore

Për periudhën janar- qershor janë ushtruar rreth 400 kontrolle, pas të cilave janë asgjësuar mbi 5 kv mallra të ndryshme, që u kishte kaluar afati i përdorimit

KUKËS - Në këtë periudhë të nxehti, mbrojtja e konsumatorit është vënë në qendër të vemendjes nga Autoriteti Kombëtar Rajonal i Ushqimit në Kukës.
Drejtori i këtij institucioni, Bilbil Myftari, pohon se kontrolli për mallrat e konsumit është shtrirë edhe në zonat rurale, si edhe në pikat e kalimit kufitar.

"Për periudhën janar- qershor janë ushtruar rreth 400 kontrolle, pas të cilave janë asgjësuar mbi 5 kv mallra të ndryshme, që u kishte kaluar afati i përdorimit”, thotë Myftari.

Sipas tij, si pasojë e kontrolleve të vazhdueshme nga vetë tregtarët, në jo pak raste asgjësohet malli, të cilit i ka kaluar afati i përdorimit, gjë që ka lehtësuar punën e specialistëve të Autoritetit Kombëtar të Ushqimit.

Ndërkohë që kontrolli është rritur edhe në doganën e Morinit, nga ku lëvizin në të dy anët e kufirit sasi të mëdha malli për konsum. "Kontrolli është i shtrirë gjatë 24 orëve. Për këtë janë në kontroll të vazhdueshëm 6 inspektorë, prej të cilëve 2 janë veterinerë, 2 teknologë dhe 2 agronomë", thotë Myftari.

Problemin e kontrollit të mjeteve të rënda e ka lehtësuar edhe ngritja e terminalit të ri, në mjediset e doganës së Morinit, gjë që ka eliminuar radhët e gjata të pritjes.

HermesNews - ©2013

Dërgo me email | Stampo artikullin