17/07/2013 20:25:21

Berisha, rritem rrogat me 6 % dhe pensionet me 4-5%

Kreu i qeverisë u shpreh se kjo rritje e rrogave dhe pensioneve është 2-3 herë më e madhe se sa rritja e inflacionit vjetor prej 2%

TIRANE - Kryeministri Sali Berisha informoi të mërkurën në rrjetin social 'facebook' mbi vendimin e marrë në mbledhjen e qeverisë, të mërkurën, për rritjen me 6 % të pagave të punonjësve të administratës, si dhe të pensioneve me 4-5 %. "Të dashur miq, sot në mbledhjen e qeverisë, në përputhje me ligjin e buxhetit të vitit 2013 të votuar në Parlament në dhjetor të vitit 2012, u vendos rritja mesatare me 6% e rrogave te punonjesve buxhetore dhe rritje e pensioneve në qytet me 4% dhe pensioneve në fshat me 5%", tha kryeministri. Kreu i qeverisë u shpreh se kjo rritje e rrogave dhe pensioneve është 2-3 herë më e madhe se sa rritja e inflacionit vjetor prej 2%.

Me këtë rritje, shkruan kryeministri, paga mesatare në Shqipëri rritet nga 50 100 ne 52 782 mijë lekë në muaj. Kështu, shprehet më tej Kryeministri Berisha, për punonjësit mbështetës të institucioneve buxhetore paga mesatare rritet në 37 199 lekë në muaj, për punonjësit e administratës qendrore 67 222 lekë, për mësuesit 53 342 lekë, për mjeket 58 098 lekë, për infermieret 37 854 lekë, për ushtarakët 43 472 leke, për policinë 57 344 lekë.

"Nuk rriten rrogat më të larta", deklaron kryeministri. Berisha informoi edhe për vendimin për rritjen e pensioneve. "Pensioni minimal në qytet rritet në 12 024 lekë, ndërsa të ardhurat pensionale minimale, përfshirë kompensimet, rriten në 14 174 lekë. Pensionet minimale në fshat rriten në 8 233 lekë dhe të ardhurat pensionale minimale në fshat rriten në 9 123 lekë", shkruan Berisha. Nuk është llogaritur këtu rimbursimi i plotë i mbi 92% të ilaçeve që marrin pensionistet, informon më tej Kryeministri, duke shtuar se "ne mbajmë premtimet tona".

HermesNews - ©2013

Dërgo me email | Stampo artikullin