16/07/2013 16:46:02

Egjipti i pakënaqur me Erdogan: tensione në gadishullin Sinai

Zëdhënësi i Ministrisë Egjiptiane Badr Abdelatty i kërkoi Ankarasë vënien e interesave të përbashkëta dhe lidhjeve historike mes dy vendeve mbi çdo konsideratë tjetër

(16:53) Ushtria egjiptiane po përgatitet të ndërmarrë një operacion në gadishullin e Sinait, ku sulmet tashmë janë shpeshtuar që prej largimit të presidentit islamik, Mohamed Morsi, duke kërcënuar kështu sigurinë në zonën kufitare me Izraelin, sipas disa burimeve ushtarake. Gjatë dy javëve të fundit, persona të armatosur kanë sulmuar vazhdimisht ushtrinë dhe forcat policore të gadishullit. Gjatë ditës së djeshme, tre persona vdiqën dhe 17 të tjerë u plagosën në një sulm në veri të Sinait. Një zyrtar i lartë ushtarak konfirmoi se ushtria do të ndërmerrte një operacion në Sinai, pa dhënë detaje të tjera.


KAJRO - Egjipti shprehu mbrëmë një pakënaqësi të theksuar në lidhje me deklaratat e kryeministrit turk, Recep Tayyip Erdogan në mbështetje të presidentit të rrëzuar, Mohamed Morsi, që sipas liderit turk është viktima e një grushti shteti.

"Ekziston një pakënaqësi e theksuar për sa u përket deklaratave të përsëritura të zyrtarëve turq në lidhje me situatën në Egjipt", deklaroi zëdhënësi i Ministrisë egjiptiane të Punëve të Jashtme, Badr Abdelatty.

Zëdhënësi i kërkoi Ankarasë vënien e interesave të përbashkëta dhe lidhjeve historike mes dy vendeve mbi çdo konsideratë tjetër. Gjatë një konference shtypi, edhe zëdhënësi i presidentit të përkohshëm, Adly Mansour, Ahmad Mouslimani, u shpreh i pakënaqur me deklaratën.

Kryeministri turk, Erdogan deklaroi të dielën për të përditshmen turke "Zaman" se ish-presidenti egjiptian i rrëzuar nga ushtria ishte për të i vetmi kryetar shteti i ligjshëm, pasi ishte zgjedhur me votë popullore.

"Do ta kishim respektuar regjimin e dalë nga grushti i shtetit nëse do të ishte rezultat i një fitoreje elektorale", shtoi Erdogan, duke iu referuar autoriteteve të reja egjiptiane.

HermesNews - ©2013

Dërgo me email | Stampo artikullin