16/07/2013 09:00:51

Ushtaraku vret gruan për xhelozi: dje, tjetër vrasje nga dhuna

Alketa Cani është goditur me kallashnikov nga bashkëshorti që më pas u vetëplagos

TIRANE - Një burrë ka vrarë gruan e tij brenda shtëpisë me kallashnikov. Krimi ka ndodhur rreth orës 18:10, dje pasdite në rrugën "Sadik Petrela", zonë e njohur si "Kodra e Priftit". Gruaja ka vdekur në vend, ndersa Ilirjan Cani, bashkëshorti i saj, është vetëplagosur me të njëjtën armë.

Alketa Cani ishte nënë e dy fëmijëve të mitur, 12 dhe 13 vjeç që në atë moment nuk ndodheshin në banesë, por në plazh me gjyshërit.

Janë të paqarta shkaqet e veprimit, por nga dëshmitë e të afërmve dhe komshive burri dyshonte për lidhje jashtëmartesore të gruas.

Ilirjan Cani, ushtarak që punonte në repartin 302 në Zall Herr, u dërgua drejt spitalit ushtarak në gjendje kritike për jetën.

Alketa Cani, dhunohej fizikisht nga bashkëshorti, por kohët e fundit ata kishin premtuar se do të rifillonin jetën, çfarë mesa duket nuk kishin për qëllim ta bënin vërtet.

Po dje, një 37-vjecare nga Fushë-Mamurrasi, ka gjetur vdekjen si pasojë e goditjes me mjete të forta nga bashkëshorti i saj, për motive xhelozie.
42-vjecari Marjan Lleshi, i cili është arrestuar nga policia, e ka goditur bashkëshorten e tij, nënë e dy fëmijëve me mjete të forta duke i shkaktuar vdekjen.

HermesNews - ©2013

Dërgo me email | Stampo artikullin