10/07/2013 15:49:28

Gjykata e Lartë në Londër de-legjitimon drejtësinë shqiptare

Trupi gjykues vendosi mosekstradimin e 30 vjeçarit Fatjon Kapri i akuzuar për vrasje nga një gjykatë shqiptare: shkak, sistemi i korruptuar shqiptar i cili mund të shkelë të drejtën për një gjykim të ndershëm, parashikuar nga Karta Europiane për të Drejtat e Njeriut

LONDER - Gjykata e Lartë në Britani vendosi sot që i pandehuri Fatjon Kapri nuk mund të ekstradohet në Shqipëri, për shkak të korrupsionit të sistemit të drejtësisë atje.

Presidenti i trupit gjykues Lordi Hope, tha se Fatjon Kapri, i akuzuar për vrasje nga Gjykata e Elbasanit me 22 vite burg në mungesë për vrasje të ndodhur jashtë, mund të mos përballet me gjykim të ndershëm në vendlindje.

Kapri kishte vrarë me thikë Ylli Pepan në vitin 2001 dhe pas kësaj ishte arratisur në Glasgow ku kishte punuar me identitetin maqedon Sajmir Sadiku.

Ai u zbulua në Skoci në Qershor të 2010-të, kohë kur autoritetet shqiptare kërkuan dhe ekstradimin.

Vrasësi bëri kërkesë e cila u hodh poshtë nga Gjykata e Apelit të Edinburgh-ut në muajin Maj, shkruan Telegraph.

Por Gjykata e Lartë vendosi të marrë për bazë deklarat e Kaprit për korrupsion në sistemin juridik shqiptar dhe vendosi që ai të mos ekstradohet, sepse kjo, "mund të shkelë të drejtën për një gjykim të ndershëm sipas Konventës Europiane për të Drejtat e Njeriut." Shqipëria iu bashkua Këshillit të Europës në 1995 dhe ratifikoi ECHR më 1996.

Trupi gjykues urdhëroi Gjykatën e Apelit të rimarrë në dorë çështjen.

"Eshtë e vështirë të nxjerrësh të vërtetën. Nuk ka tym pa zjarr, por aty ku lidhjet me korrupsion janë të njohura duhet të merren seriozisht", tha Lord Hope në vendimin e tij.

"Akuzat që i pandehuri bën jënë seriozisht të mjaftueshme për t'a riparë çështjen, në mënyrë që të vendoset sa sistematik apo i përhapur problemi është tani. "

30 vjeçari i cili ka qenë në arrest do të ngelet pas hekurave deri në seancën e radhës, ndërkohë ky vendim ka përhapur debate të shumta në vend.

Doriana Metollari

Dërgo me email | Stampo artikullin