10/07/2013 14:55:50

100 biznese pa kasa fiskale në Kukës: mbyllen aktivitetet

Organet tatimore pranojnë në heshtje fenomenin

KUKES - Rënia e xhiros dhe e klientelës ka sjellë shtimin e përpjekjeve të biznesmenëve ne zonen verilindore për t’iu shmangur detyrimeve fiskale. Një gjë e tillë ka sjellë edhe mbylljen e një numri biznesesh private në bashkinë e Kukësit. Thuajse të gjtiha bizneset kanë eliminuar përdorimin e kasës fiskale, një fenomen që është pranuar në heshtje edhe nga organet tatimore.

"Për periudhën janar - qershor kanë mbyllur aktivitetin e tyre 25 biznese të vogla, kryesisht lokale shërbimi dhe tregtie", thotë përgjegjësi i zyrës së tatim- taksave në bashkinë e Kukësit, Pajtim Duraku. Sipas tij, ka edhe biznese që po mbyllin aktivitetin e tyre për shkak të dhënies në formë borxhi të mallrave familjeve me pak të ardhura, pa arritur t’i mbledhin për shumë kohë prej tyre të ardhurat, çka i con drejt falimentimit, ose në ndryshimin e drejtimit të biznesit.

Tendenca e mbylljes së veprimtarisë private në jo pak raste është fiktive, me synimin e mosshlyerjes së detyrimeve fiskale. Një gjë e tillë është vërejtur pas ushtrimit të kontrollit nga policia bashkiake në bashkëpunim me specialistët e zyrës së tatim- taksave të bashkisë së Kukësit. "Është evidentuar se të paktën 100 biznese ushtrojnë aktivitetin e tyre të paregjistruar, duke mos shlyer asnjë detyrim fiskal", thotë Duraku.

HermesNews - ©2013

Dërgo me email | Stampo artikullin