10/07/2013 14:37:56

PS kërkon transparencë fiskale nga Ministria e Financave

PS i kërkon këtij dikasteri të mbledhë me përgjegjshmëri detyrimet, të ndërpresë negociatat për kontrata e projekte me financues të ndryshëm që e thellojnë borxhin e vendit

TIRANË - Partia Socialiste i kërkoi sot Ministrisë së Financave që të bëjë sa më parë publikë treguesit fiskalë për 6 muajt e parë të këtij viti. Në një deklaratë për shtyp, deputeti i PS-së, Ilir Beqja tha se situata është e vështirë pasi në pesë muajt e parë të vitit nga tatimet dhe doganat janë arkëtuar 105 milion dollarë më pak se programi i fillimvitit. "Vetëm në muajin Qershor mosrealizimi është shtuar dhe me pesë milion dollarë të tjerë dhe me këto ritme ekspertët tanë parashikojnë që mosrealizimi të arrijë në 400 milion dollarë deri në fund të vitit", tha Beqja. PS i kërkon këtij dikasteri të mbledhë me përgjegjshmëri detyrimet, të ndërpresë negociatat për kontrata e projekte me financues të ndryshëm që e thellojnë borxhin e vendit, ndërsa i kërkoi Thesarit që të garantojë pagesat e ndihmës ekonomike, pagesat e personave me aftësi të kufizuar, të rrogave e pensioneve, etj.

HermesNews - ©2013

Dërgo me email | Stampo artikullin