02/07/2013 11:08:43

Ndërron qeverisja, fiket sistemi financiar. Pse tani ?

Nga datat 12 deri me 30 Korrik, nuk do të kryhet asnjë veprim financiar

TIRANE - Fiket sistemi informatik financiar i Qeverisë (SIPQ). Ministri i financave urdheron kalimin nga versioni EBS11 ne EBSR12. Proçedura kryhet nga data 12 deri 30 Korrik 2013. Qeveria nuk do të kryejë dot asnjë veprim financiar, për shkak të fikjes së sistemit kompjuterik që merret me aktivitetin e financave në Republikën e Shqipërisë.

Ministria e Financave ka urdhëruar krehjen e të gjitha veprimeve lidhur me pagat e punonjësve përpara kësaj periudhë. Ministria urdhëroi që pagesat e domosdoshme të ISSH dhe ISKSH dhe ato të borxhit shtetëror, të ekzekutohen nga Banka e Shqipërisë me urdhër të ministrit të Financave.
Zëvendësimi i sistemit.

Në urdhrin e datës 5 Maj 2013, Ministri i financave Ridvan Bode vë në dijeni institucionet buxhetore se nga data 12 deri 30 Korrik do të kryhet “proçesi teknik i instalimit të versionit të ri të sistemit informatik financiar të qeverisë (SIPQ) kalimi nga versioni EBS11 në versionin EBSR12, sipas kontratës ndërmjet Ministrisë së Financave dhe Kompanisc Infosoft System shpk për menaxhimin e veprimtarisë financiare në kushtet e pamundësisë së përdorimit të SIFQ”, pa dhënë detaje.

Më tej në urdhrin e Bodes specifikohet se për këtë periudhë SIFQ do të jetë i fikur dhe nuk do të kryhet asnjë proçes në të. Në urdhër shkruhet se të gjitha veprimet e tjera si kontabilizimi i të ardhurave buxhetore të arkëtuara nga sistemi bankar, regjistrimi i vlerave të prokurimeve, regjistrimi i kontratave, regjistrimi i urdhër-shërbimeve, ekzekutimi i raporteve, proçeset e rakordimet dhe çdo veprim tjetër, do të kryhen pasi SIPQ të rifillojë funksionimin.

Njëherësh Bode i kërkon administratës tatimore të mos aplikojë gjoba ndaj institucioneve shtetërore, të cilat për shkak të fikjes së SIPQ vonojnë ekzekutimin e pagesave sipas përcaktimeve ligjore.

HermesNews - ©2013

Dërgo me email | Stampo artikullin