01/07/2013 12:32:15

180 mijë emigrantë shqiptarë të kthyer nga Greqia

Shkak, taksat e larta dhe rritja e kostos së jetesës

ATHINE - Gazeta greke ''Ta Nea'' citon një raport te ACIT-it (Albanian Center for Competitiveness and International Trade), sipas të cilit rreth 18-22% e emigrantëve shqiptarë që jetojnë dhe punojnë në Greqi, janë kthyer në Shqipëri, rreth 180 mijë persona.

Shkak sipas ekspertëve janë taksat e larta dhe rritja e kostos së jetesës, shoqëruar kjo dhe me kufizimin e mundësive dhe papunësinë që shkon në 27.4%.

“Kriza financiare ka detyruar shqiptarët që të rikthehen në vendin e tyre si kurrë më parë. Pas shumë vitesh qëndrim në Greqi, pasi janë bërë kryefamiljarë, kthimi në atdhe nuk është e lehtë për të gjithë shqiptarët”, thuhet në raportin e ACIT-it (Albanian Center for Competitiveness and International Trade).

Autoritet në Shqipëri po inkurajojnë rikthimin e emigrantëve, duke u akorduar një ndihmë financiare prej 60 euro për familje. Por vetëm 5% e të riatdhesuarve kërkojnë dhe marrin këtë përkrahje financiare.

ACIT thekson se vala e të rikthyerve pritet që të vërë në presion shërbimet publike të Shqipërisë sidomos sistemin arsimor dhe atë shëndetësor.

HermesNews - ©2013

Dërgo me email | Stampo artikullin