01/07/2013 09:20:24

E quajnë atdheu i kravatës...

Që sot anëtare e BE-së

ZAGREB - Shteti i vogël i Kroacisë, që iu bashkua sot BE-së, ka një trashëgimi po aq të diversifikuar sa edhe të papublikuar më parë, atë të kravatës, një aksesori thelbësor të elegancës mashkullore, racës së qenve dalmatë të famshëm prej filmave të Walt Disneyt dhe sportistëve me famë botërore.

"Në çdo rast, ata që mohojnë ndikimin e vendeve të vogla të Europës, duhet të kujtohen se kroatët mund të na kapin për fyti", shkruan Norman Davies në librin e tij "Europa - një histori".

Sigurisht që historiani i referohej kravatës, me origjinë nga Kroacia, që mbahet përditë nga më shumë se 700 milionë meshkuj në botë dhe që e lidhin me dashuri dhe përkushtim.

"Gjatë shekujve, vajzat e lidhnin këtë aksesor në qafën e të dashurve, si simbol i dashurisë dhe besnikërisë", shprehet Marijan Busiç, themeluesi i organizatës joqeveritare "Academia Cravatica" duke shpjeguar origjinat dhe përdorimin e këtij aksesori.

Trupat kroate, pjesë e ushtrisë franceze gjatë Luftës së Tridhjetë Viteve në shek. XVII, mbanin kravatë si një aksesor dallues. Vetë Luigji XIV përshtati një të tillë, dhe që në atë moment, kravata u përhap edhe në Britaninë e Madhe e më pas në Evropë e në botë.

Fjala "croata" është në shumë gjuhë rrënja e fjalës kravatë. Në botën e kafshëve shtëpiake, qentë e racës dalmate mbajnë vendin e nderit për sa i përket gëzofit të tyre të bardhë të njollosur me pika të zeza ose kafe. Walt Disney i ktheu ata në heronj me anë të kartonit me metrazh të gjatë, "101 dalmatët".

Kjo racë, ashtu siç sugjeron dhe emri, e ka origjinën në Dalmaci, zonë bregdetare e Kroacisë, e famshme për peizazhet madhështore dhe ishujt e panumërt. Që prej shek. XVI gjenden gjurmët e shkrimeve në arkivat e kishave dhe piktura ku shfaqet kjo racë qensh të shkathët e të zhdërvjellët, me përmasa mesatare.

Por, pa dyshim janë sportistët ata që kanë lënë gjurmë në historinë e vendit me 4,2 milionë banorë. Janë të shumtë ata që bëjnë pjesë në elitën ndërkombëtare të disiplinave të tyre, si në sportet individuale ashtu edhe në ato në ekip.

"Më duket tejet mbresëlënëse cilësia e prodhuar nga Kroacia në sportet konkurruese. Sportistët kroatë mbeten një rekomandim i shkëlqyer dhe një shembull që ilustron potencialin e këtij vendi", shprehet Russell Owens, një shtetas britanik 47-vjeçar, i cili jeton tashmë në Kroaci.

Bëhet fjalë për kampionët e skive, Janica dhe Ivica Kosteliç, për legjendën botërore të tenisit, Goran Ivanisheviç ose për kampionen e kërcimit së larti Blanka Vlasiç, të gjithë në majat e botës së sportit falë talentit të tyre.

Për sa u përket ekipeve, Kroacia u shpall kampionia botërore e hendbollit në vitin 2003 dhe kampione olimpike në vitet 1996 dhe 2004, si dhe kampione në uoterpol në vitin 2007.

Pa harruar basketbollin, që i dhuroi botës të palodhurin Drazhen Petroviç, i cili vdiq në vitin1993, dhe legjendarin Toni Kukoç, tre herë kampion në NBA me skuadrën "Chicago Bulls" pranë Michael Jordan.

Kroacia mban me vete edhe proshutën e rajonit perëndimor, Vodnjan. Prodhuesit e kësaj proshute, që është krenaria kombëtare e Kroacisë, shpresojnë në të ardhmen të marrin patentën evropiane për të mbrojtjen e origjinës së këtij produkti të quajtur "përsut".

HermesNews - © 2013

Dërgo me email | Stampo artikullin