29/06/2013 07:10:00

Rama i impenjuar në Qeverisje: Meta kryetar Parlamenti

Fituesit e zgjedhjeve pas takimit, bënë apel që Qeveria në detyrë të mos marrë vendime për konçesioni të reja të pasurive publike

TIRANE - Edi Rama do të jetë kryeministri i shqiptarëve dhe kjo dihej. Ajo e u zbulua dje për mediat ishte deklarata zyrtare se Ilir Meta do të jetë Kryetari i Parlamentit Shqiptar. Lajmi u dha pas takimit, rreth një orë, që krerët paten me njeri tjetrin, në çelje të negociatave për qeverisje.

Fituesit e zgjedhjeve konfirmuan angazhimin publik PS-LSI për të ndarë mandatin e deputetit nga detyra ekzekutive e ministrit.

Rama dhe Meta janë shprehur të shqetësuar se Qeveria në detyrë po vazhdon në një inerci që nuk është në dobi të vendit e të qytetarëve. Ata bënë apel për urtësi e përgjegjshmëri nga ana e kryeministrit në detyrë dhe e qeverisë së tij, në mënyrë që të mos ndërmerren hapa që bien ndesh me etikën e një qeverie kujdestarie.

Ata kërkuan të ndalen prokurorimet e reja, të mos merren vendime për konçesione të reja të pasurisë publike, të garantohet që administrata të mos përfshihet në veprime antiligjore apo joetike të orës së fundit me arkën e shtetit.

Në ditën kur projekti Trans Adriatik për transportimin e gazit të Azerbajxhanit në Europë, që kalon përmes Shqipërisë, është konfirmuar zyrtarisht si fitues nga konsorciumi ''Shah Deniz II'', kreu i PS-së dhe LSI-së kanë rënë dakord për krijimin e një Task Force.

Muaji Shtator do të jetë koha kur shqiptarët që i besuan me votë qeverisë së re, do të njihen me planin e punës së 300 ditëve të para dhe për detajimin e tij, do ngrihet një grup pune i përbashkët nën drejtimin e Sekretarit të Programit të PS-së, Ilir Beqja, dhe anëtarin e kryesisë së LSI-së, Edmond Haxhinasto.

Kryesocialisti do të takohet me liderin e LSI-së dhe krerët e partive të tjera aleate për të realizuar ndarjen përfundimtare të pushtetit me aleatët.

Doriana Metollari

Dërgo me email | Stampo artikullin