26/06/2013 17:31:38

Huffington Post edhe në Afriken veriore:një zë në favor të demokracisë

Siti i famshëm i informacionit, Huffington Post, do të shtrihet tashmë edhe në Afriken Veriore

HermesNews - Siti i famshëm i informacionit, blogu i blogëve, Huffington Post, do të shtrihet tashmë edhe në Afriken veriore duke përfshirë shtetet si Tunizia, Algjeria, Maroku. Ai do të titullohet “Al” Huffington Post dhe do të jetë kryesisht në gjuhën franceze.

Pas suksesit që korri në Shtetet e Bashkuara, ku edhe lindi, në Angli, Kanada, Francë, Spagnë, Itali, së fundmi në Japoni dhe së shpejti në Gjermani, Huffington Post, i ideuar nga Arianna Huffington dhe me mbi 75 milion vizitorë në muaj, do të shtrihet edhe në Afrikën e Veriut.

Përsa i përket këtij edicioni afrikan, siti është i përbërë nga tre redaksi , secila me gjashtë deri në tetë gazetarë profesionist. Redaksia tuniziane është aktive që dje, ndërsa ajo marokene dhe algjeriane do të aktivizohen brenda vitit. Dy partnerët kryesorë të themelimit janë gazetarja Alix Etournaud dhe Farès Mabrouk, gjithashtu bashkëthemelues të Institutit arab të politikës. Drejtor editorial është vendosur Kader Abderrahim dhe kryeredaktore Houeida Anouar.

Hapja e edicionit të Afrikës veriore është një lajm shumë i mirë pasi mund të konsiderohet si një efekt anësor i “Pranverës arabe”, e cila s’do të ishte bërë e mundur pa shpërthimin e social network-ëve.
E gjithë kjo nënkupton një liri gjithnjë e në rritje të shtypit .

“Ambicjet tona janë të mëdha, mjetet të kufizuara, por entuziasmi yne është i pafund. Kur lind një projekt i ri editorial e ndjejmë të gjithë, edhe pse për pak, gurin e vogël që hidhet në forcim të demokracisë pluraliste”- shkruan drejtori Abderrahim në editorialin e tij të parë.

Nga ana e saj, Arianna Huffington fton të gjithë popujt e Afrikës Veriore të bashkojnë zërat e tyre në “bisedën botërore” gjithnjë e në rritje që përfaqëson blogu i saj. Dhe padyshim “bisedë botërore” është një sinonim i bukur i fjalës demokraci.

Daniela Vathi

Dërgo me email | Stampo artikullin