25/06/2013 17:19:37

Ajala, në Shqipëri fillon epoka e re. Në pritje të fjalimit të fitores

Në fund të fjalës së tij, Rama tha se, 'çdo shqiptar që votoi në 23 qershor pavarësisht për kë forcë politike, duhet të jetë krenar se e bëri Shqipërinë krenare në sytë e botës'

TIRANË - Kryetari i Partisë Socialiste Edi Rama, i shoqëruar edhe nga Sekretari i Internacionales Socialiste, Luis Ajala, gjatë një daljeje publike në selinë e PS, e cilësoi rezultatin ende jo zyrtarë të zgjedhjeve të 23 qershorit, si të paparashikueshëm, duke e krahasuar rëndësinë e tyre me ato të vitit 1992, të cilat siç u shpreh ai, mbyllën një epokë për të hapur një tjetër.

Rama deklaroi para mediave dhe simpatizantëve të mbledhur pranë selisë së partisë se, “në respket të etikës dhe demokracisë europiane, do të presë qetësisht rezultatin zyrtar të proçesit zgjedhor, para së të mbajë fjalimin e fitores”, ndërkohë që kërkoi nga pala kundërshtare, të pranojë rezultatin.

Duke e vlerësuar procesin zgjedhor të lirë dhe demokratik, lideri i PS-së, u bëri thirrje të gjitha skuadrave numëruese të votave, “të vazhdojnë të bëjnë detyrën në mënyrë që Shqipëria të fillojë nga puna”. Në fund të fjalës së tij, Rama tha se, “çdo shqiptar që votoi në 23 qershor pavarësisht për kë forcë politike, duhet të jetë krenar se e bëri Shqipërinë krenare në sytë e botës”.

Ndërsa sekretari i Internacionales Socialiste, teksa përgëzoi për fitoren të majtën shqiptare, por dhe dy liderët kryesorë të saj Edi Ramën e Ilir Metën, tha se, “ky rezultat është një lajm i shkëlqyer për Shqipërinë, për Europën dhe për gjithë familjen socialdemokrate në mbarë botën”. Sipas tij, bashkimi i fortë i së majtës, solli një vizion të ri për vendin.

HermesNews - ©2013

Dërgo me email | Stampo artikullin