24/06/2013 21:58:33

Kjo nuk është Rilindja e Ramës

nga Doriana Metollari

HermesNews - E kisha parashikuar fitoren e Ramës, për nga forma me të cilën ai zhvilloi fushatën elektorale. Online (sidomos ne fillim) dhe terren. Kohët e fundit në tv.

Socialistët ideuan Rilindjen dhe programi ishte tejet i gjetur. Plus që njerëzit votuan sepse besojnë në një ndryshim. Rilindja do të fillojë ta bëjë ndryshimin që me mënyrën sesi do të sillet me kundërshtarët e tij. Do të ketë forcën të ndërtojë mbi atë që filluan të tjerët, pa denigruar punën e tyre ?

Do të ketë forcën t'i japë Shqipërisë një imazh të ri, para Europës, me ide të qarta dhe vizione të hapura ?

Do të mund t'i japë Shqipërisë një Rilindje, pa u fokusuar vetëm tek Rilindja e vet ?

Unë besoj se socialistët mund ta bëjnë ndryshimin e vërtetë, nëse tregojnë se forma e qeverisjes së tyre do të jetë një forme e re, jo hakmarrëse, jo denigruese, por ndërtuese me debate pa paragjykime.

Besoj se fati dhe e ardhmja e Shqipërisë, me dhe pa Europën, flas për Shqipërine time, ate të bekuarën e Zotit, që vetes nuk ia di kurrë vlerat, pra fati i saj, varet tek edukimi dhe kultura që liderët, i japin brezave.

Të gjitha krahët pa përjashtim, demokratë dhe socialistë, apo të tjerë. Të gjithë kanë vënë një gurë aty ku kanë menduar se duhet, mirë apo keq. Do ta kishin bërë më mirë, nëse do të ishin qenë më pak të impenjuar së qëni të konflik me kundërshtarin.

Besoj se nëse socialistët do të shfrytezojnë profesionalizmin e profesionistëve të vërtetë, do të mund të krijojnë një klimë shumë të mirë pune.

Ky është një fillim i mbarë. E rëndësishme është që kjo të mos bëhet një ditë Rilindja e Rames, sepse centralizimi i pushtetit është diktaturë dhe diktatura ndrydh energjitë e njerëzve.

Kjo është Rilindja e shqiptarëve dhe shqiptarët janë të gjithë.

Shqiptarët janë dhe ata që nuk kanë votuar dhe ata që janë nëpër burgje e që meritojnë një trajtim njerëzor, ata që ngujohen, ata që janë pa punë.

Në këto zgjedhje nuk pat dëshmor, pat një viktimë të një sistemi që deri tani ka ushqyer vetëm dhunë. Sa keq, mund të kishin bërë më mirë, shumë më mirë se kaq.

HermesNews - ©2013

Dërgo me email | Stampo artikullin