24/06/2013 13:24:10

Apeli i Kukan, pranoni rezultatin e ketyre zgjedhjeve

I shoqëruar nga ambasadori i BE-së në Tiranë, Ettore Sequi, Kukan ka zhvilluar takime me Kryeministrin Sali Berisha dhe më pas edhe me kreun e PS-së, Edi Rama

TIRANË - "Procesi i votimit ishte i qetë, ndërsa shpresojmë që kështu të vazhdohet", deklaroi sot Kryetari i komisionit Ad Hoc i Parlamentit Evropian, Eduard Kukan. I shoqëruar nga ambasadori i BE-së në Tiranë, Ettore Sequi, Kukan ka zhvilluar takime me Kryeministrin Sali Berisha dhe më pas edhe me kreun e PS-së, Edi Rama. Në një prononcim për mediat, në përfundim të takimit me Ramën nga selia rozë, Kukan tha se përveç incidentit të Laçit, procesi ishte normal, duke shtuar se zgjedhjet do të jenë fitorja e Shqipërisë dhe një hap përpara drejt Bashkimit Europian. "PE po e ndjek me interes procesin zgjedhor. Është përgjegjësi e liderëve politikë për këtë mbarëvajtje të procesit zgjedhor, pasi këto zgjedhje janë vendimtare për vendin, është fitore për gjithë vendin, për integrimin në BE dhe të ardhmen evropiane", tha Kryetari i delegacionit të PE për marrëdhëniet me Evropën Juglindore. I pyetur nga mediat lidhur me takimin e zhvilluar me Kryeministrin Berisha dhe kryesocialistin Rama, Kukan tha se "u dhashë të njëjtin mesazh që të dyve, se të gjithë në Europë presin zgjedhje të ndershme". Ndërsa Ambasadori Sequi bëri të ditur për një komunikim me mediat në orët në vijim.

HermesNews - ©2013

Dërgo me email | Stampo artikullin