24/06/2013 08:39:45

Kukës, vijon proçesi i numërimit

“Janë numëruar 24 kuti votimi dhe kanë mbetur për t’u numëruar 8 kuti të tjera, të cilat i përkasin bashkisë së Krumës, për t’i dhënë fund edhe procesit të numërimit

KUKËS - Procesi i numërimit të votave në qarkun e Kukësit vazhdon me ritme normale, ndonëse te numëruesit vërehet lodhja. Kryetari i KZAZ-së nr. 11, Dëfrim Korbi, bëri të ditur të hënën se në qarkun e Kukësit, pas një pushimi, ka rinisur procesi i numërimit të votave në zonën zgjedhore nr. 10, që përfshin rrethin e Hasit.

“Janë numëruar 24 kuti votimi dhe kanë mbetur për t’u numëruar 8 kuti të tjera, të cilat i përkasin bashkisë së Krumës, për t’i dhënë fund edhe procesit të numërimit”,- tha kryetari i KZAZ-së, Sahit Jaku.

Në zonën zgjedhore Nr.11, në rrethin e Kukësit, janë numëruar kutitë e votimit të komunave Grykë Çajë, Arrën, Bushtricë, Malzi dhe Kalis, ku nga numërimi i deritanishëm, sipas Jakut, koalicioni i PD-së ka marrë rreth 67 për qind të votave, ose 1876 vota, kundrejt 1056 votave të koalicionit të PS-së.

Ndërsa në zonën zgjedhore nr.9, që përfshin rrethin e Tropojës, koalicioni i PD-së ka marrë deri tani 1693 vota, kundrejt 410 votave të koalicionit të PS-së. Jaku tha se në orët e drekës pritet të përfundojë numërimi i të gjitha votave të zonës zgjedhore Nr. 10, ndërsa në dy zonat e tjera, procesi i numërimit pritet të vazhdojë edhe në orët e natës.

HermesNews - ©2013

Dërgo me email | Stampo artikullin