24/06/2013 08:38:22

Alarmi i rrëmë, një njeri i humbur në det

Kapiteni i portit, Hysni Aruçi, tha se ngjarja ka ndodhur në bordin e anijes rreth orës 01.20, të mëngjesit të sotëm

DURRËS - Trageti “Rigel 1”, që ishte nisur nga Durrësit drejt Barit, Itali, është detyruar ta ndërpresë për katër orë radhazi lundrimin, për shkak të njoftimit për humbjen e një njeriu në det.

Kapiteni i portit, Hysni Aruçi, tha se ngjarja ka ndodhur në bordin e anijes rreth orës 01.20, të mëngjesit të sotëm, kur një nga udhëtarët ka njoftuar se dikush është hedhur në det.

Ekuipazhi i tragetit, që ndodhej 15 milje larg Durrësit, i mbështetur edhe nga tragetet e tjerë në lundrim, ka nisur kërkimet në det për disa orë.

Ndërkaq, nga kontrollet sipas listave të udhëtarëve në traget, si dhe në listat e personelit të tragetit nuk ka patur asnjë mungesë. Kapiteni i poritt, Aruçi, tha se "në orën 05.30 kapiteneria ka lejuar komandantin e tragetit “Rigel 1” të vijojë lundrimin drejt Barit".

Kjo anije do të mbërrijë në portin italian me disa orë vonesë, si pasojë e ndërprerjes së udhëtimit natën e kaluar.

HermesNews - ©2013

Dërgo me email | Stampo artikullin