22/06/2013 18:27:25

Apeli i KQZsë për median, monitorim i ndershëm

'Media kudo është e lirë dhe nuk ka nevojë të kërkojë leje për të bërë punën e saj. Sa i takon ushtrimit të lirë të profesionit të tyre, gazetarët nuk i pengon asnjë ligj', tha ajo

TIRANË - "Media është e lirë të bëjë punën e saj gjatë zgjedhjeve, edhe pa pasur akreditimin zyrtar nga KQZ", u shpreh të shtunën kryetarja e KQZ-së, Lefterije Lleshi, gjatë mbledhjes së radhës së Komisionit.

Nisur nga një lloj konfuzioni i krijuar nga numri i madh i kërkesave për akreditim, në rastin e përfaqësuesve të medias, kryetarja Lleshi tha sot se asgjë nuk e pengon median të kryejë detyrën e saj gjatë procesit zgjedhor.

"Kemi pasur shumë kërkesa për akreditim edhe nga mediat. Por, kjo nuk do të thotë që edhe ato që nuk janë të akredituar të përjashtohen nga monitorimi pranë qendrave të votimit. Kjo është një cilësi që buron jo vetëm nga kodi zgjedhor, por dhe nga ligje të tjera. Edhe ai që nuk është i akredituar pranë KQZ-së me cilësinë e gazetarit ka të drejtë të kërkojë të vëzhgojë procesin", tha znj. Lleshi.

"Media kudo është e lirë dhe nuk ka nevojë të kërkojë leje për të bërë punën e saj. Sa i takon ushtrimit të lirë të profesionit të tyre, gazetarët nuk i pengon asnjë ligj", tha ajo.

HermesNews - ©2013

Dërgo me email | Stampo artikullin