22/06/2013 18:19:09

Garantojmë të drejtën e votës, kërkojmë përgjegjshmëri politike

Lleshi: 'ajo që të gjithë duam është që faktorët politikë, njësoj si KQZ, të jenë të përgjegjshëm në lidhje me procesin zgjedhor'

TIRANË - Kryetarja e Komisionit Qendror të Zgjedhjeve (KQZ), Lefterije Lleshi, tha të shtunën se institucioni që ajo drejton garanton çdo shtetas që të ushtrojë të drejtën e votës të dielën, në zgjedhjet e 23 qershorit. "KQZ garanton çdo shtetas që të ushtrojë të drejtën e votës ditën e votimit. Për këtë nuk ka asnjë dyshim, pasi infrastruktura e përgatitur për këtë qëllim nga Komisioni është në kohën e duhur, në kohë reale. Ajo që të gjithë duam është që faktorët politikë, njësoj si KQZ, të jenë të përgjegjshëm në lidhje me procesin zgjedhor", tha kryetarja Lleshi, një ditë para zgjedhjeve të reja parlamentare. KQZ, vijoi ajo, "ditën e votimeve nuk duhet lënë vetëm, pasi ky institucion po e bën punën e tij pandëprerë dhe ka marrë masat në të gjithë vendin për çdo situatë që mund të krijohet. Ne të gjithë jemi këtu për të zgjidhur problemet dhe atë që i takon KQZ-së", theksoi drejtuesja e institucionit zgjedhor.

HermesNews - ©2013

Dërgo me email | Stampo artikullin